Хэрвээ ойрын үед Орос-Украины гал зогсоох яриа хэлэлцээнд ахиц гарахгүй бол АНУ зуучлагчийн үүргээсээ татгалзах гэнэ

Өчигдөр буюу Баасан гарагт АНУ-ын ерөнхийлөгч Дональд Трамп хэлэхдээ хэрвээ Орос, Украины хооронд гал зогсоох яриа хэлэлцээнд ойрын үед ахиц дэвшил гарахгүй бол тэдний хооронд зуучлах хүчин чармайлтаа зогсоож болзошгүйг анхааруулжээ.

Трампын мэдэгдлийн өмнөхөн Парис хотод Европын холбоотнуудтайгаа уулзахдаа АНУ-ын төрийн нарийн бичгийн дарга Марко Рубио мөн ижил утгатай мэдэгдэл хийсэн байна.

Рубиогийн хэлсэн зүйлийн талаар сэтгүүлч нар лавлахад Трамп “Тиймээ, тун удахгүй. Хэдэн өдөр хүлээнэ гэсэн тоо байхгүй. Гэхдээ бид тун удахгүй энэ асуудлыг нэг тийш болгоно” гэж хариулжээ.

Энэ үеэр Трамп дөрөв дэх жилдээ үргэлжилж буй дайнд ОХУ-ын ерөнхийлөгч Владимир Путин, Украины ерөнхийлөгч Володимир Зеленский нарын хэн нэгийг буруутгахаас зайлсхийж, харин талууд энх тайван тогтоох чиглэлд ямар нэг ахиц дэвшил гаргах ёстойг хэлсэн байна.

“Хэрвээ ямар нэг шалтгаанаар талуудын аль нэг нь яриа хэлэлцээг хүндрүүлбэл бид ‘Та нар тэнэг юм’ гэж хэлээд тэднийг орхих болно. Гэхдээ ийм байдалд хүрэхгүй гэдэгт бид найдаж байна” гэж Трамп хэлжээ.

Тэрбээр хоёр дахь удаагаа АНУ-ын ерөнхийлөгчөөр сонгогдохоосоо өмнө Украины дайныг 24 цагийн дотор зогсоохоо амлаж байсан.

Гэхдээ сүүлийн үед Трамп энэ амлалтаасаа бултах болсон юм.

Путин өөрөөр нь тоглож байгаа эсэхийг сэтгүүлч асуухад тэр “Надаар хэн ч тоглодоггүй юм. Би түүнд зөвхөн туслахыг хүсэж байна” гэж хариулжээ.

 

Марко Рубио, Эммануэл Макрон нар

Парис хотод Европ болон Украины удирдагчидтай уулзсаныхаа дараа Марко Рубио “АНУ энэ хүчин чармайлтаа дахин хэдэн долоо хоногоор, хэдэн сараар үргэлжлүүлэх бодолгүй байна. Тиймээс бид ойрын үед шийдвэрлэх болно” гэж хэлсэн юм.

“Хэрвээ мөд ахиц дэвшил гарахгүй нь тодорхой болбол манай ерөнхийлөгч ‘За за. Бидний хувьд дууслаа’ гэж хэлэх цэгт хүрэх байх гэж би бодож байна” гэж Рубио цааш нь хэлжээ.

Парисын уулзалтад оролцсон Европын гурван дипломат эх сурвалж Рубиогийн хэлсэн зүйл нь дайныг зогсооход хүчин чармайлт гаргахгүй байгаа Оросын талд Вашингтон бухимдаж байгаагийн илрэл болохыг баталсан байна.

Кремлийн хэвлэлийн төлөөлөгч Дмитрий Песков өчигдөр хэлэхдээ Орос улс өөрийн эрх ашгийг хамгаалахын зэрэгцээ дайныг зогсоох хүчин чармайлт гаргаж байгаа ч Вашингтонтой ойлголцоход хүндрэлтэй байгааг хүлээн зөвшөөрсөн байна.

Эх сурвалж: AFP