Трампын томоохон дэмжигч тэрбумтан “эдийн засгийн цөмийн өвөл” айсуйг анхааруулав

Билл Экман

АНУ-ын ерөнхийлөгч Дональд Трампын томоохон дэмжигчдийн нэг тэрбумтан Билл Экман түүнд худалдааны дайнаа түр завсарлахыг уриалж, эс тэгвээс “өөрөө өөрийгөө хорлох эдийн засгийн цөмийн өвөл” ирж болзошгүйг анхааруулжээ.

Уолстритийн нөлөө бүхий  санхүүчдийн нэг Экман нь Pershing Square Capital Management хувийн сангийн үүсгэн байгуулагч, гүйцэтгэх захирал юм.

Өмнөх сонгуулиар Ардчилсан Намын нэр дэвшигчийг дэмжиж байсан тэрбээр өнгөрсөн оны сонгуулиар Трампыг дэмжиж байв. Тиймээс Экманы санал Америкийн улс төрчдийн хувьд маш чухал юм.

Экман сошиал хуудсандаа АНУ-ын ерөнхийлөгч Трампын засаг захиргаанд импортын татвар нэвтрүүлэхээсээ өмнө дэлхийн улс орнуудад худалдааны яриа хэлэлцээ хийх 90 хоногийн хугацаа өгөхийг уриалжээ.

Бүх дэлхийн эсрэг нэг зэрэг худалдааны дайн зарлах нь АНУ-ын эдийн засагт дэндүү эрсдэлтэй, хөрөнгө оруулагчдын итгэлийг унагах аюултайг тэр анхааруулсан байна.

Өмнө нь тэр дэлхийн улс орнуудын удирдагчдад худалдааны дайнаас зайлсхийхийн тулд Трамптай яаралтай яриа хэлэлцээ эхлүүлэхийг уриалж байсан юм.

Харин сүүлийн мэдэгдэлдээ Трампаас түрүүлж алхам хийхийг хүссэн нь нөхцөл байдал өөрчлөгдсөнийг харуулж байна.

Уолстритийн өөр нэг чухал хүн болох JPMorgan Chase банкны ерөнхийлөгч Жэми Даймон бас Трампын зарласан худалдааны дайн Америкийн эдийн засагт сөрөг нөлөөтэйг өчигдөр анхааруулжээ.

 

Жэми Даймон

Хувьцаа эзэмшигчдэдээ илгээсэн захидалд Даймон худалдааны дайн нь “инфляцыг өсгөж, эдийн засгийн уналт бий болох магадлалыг нэмэгдүүлж байна” гэж бичсэн байна.

“Зарим сөрөг үр дагавар хугацааны уртад хуримтлагдаж, засварлахад хэцүү болох магадлалтай тул асуудлыг аль болох түргэн шийдвэрлэх хэрэгтэй” гэж Даймон бичжээ.

Үүнээс гадна Goldman Sachs банк АНУ-ын эдийн засаг хямрах магадлалыг 45 хувь болгон ахиулснаа Ням гарагт зарласан байна. Долоохон хоногийн өмнө энэ магадлалыг 35 хувь гэж тооцоолж байсан юм.

Гэсэн хэдий ч Трампын засаг захиргааныхан гаргасан шийдвэрээ хамгаалсаар байна.

Тухайлбал Ням гарагт Трамп сэтгүүлчидтэй уулзахдаа “заримдаа та нар өвчнөө эдгээхийн тулд эм уудаг биз дээ” гэж хэлсэн нь түр хугацааны бэрхшээл гарцаагүйг илэрхийлсэн хэрэг байв.

Өчигдөр CNBC суваг Трамп худалдааны дайнаа 90 хоног хойшлуулж магадгүй тухай мэдээлсэн нь АНУ-ын хөрөнгийн зах зээлийг үргэлжлэн унахаас бага ч гэсэн сэргийлсэн юм.

Гэхдээ Цагаан ордон удалгүй үүнийг эрс үгүйсгэхдээ импортын өндөр татвар нөлөөгөө үзүүлж, дэлхийн улс орнуудын түрүүч худалдааны гэрээгээ шинэчлэхээр хандаж эхэлснийг баталжээ.

Эх сурвалж: BBC