Хариу арга хэмжээгээ цуцлахгүй бол Хятадыг нэмэлт 50 хувийн импортын татвараар шийтгэхээр Трамп сүрдүүллээ

Өнгөрсөн Лхагва гарагт ерөнхийлөгч Дональд Трамп дэлхийн бараг бүх улсаас АНУ-д нийлүүлдэг бараанд импортын татвар оноох шийдвэрээ зарласан.

Ингэхдээ Хятад улсын бараа бүтээгдэхүүнд хамгийн өндөр татвар оноосон юм.

Баасан гарагт Бээжингийн эрх баригчид ижил хариу арга хэмжээ авч, АНУ-аас Хятадад нийлүүлдэг бараанд импортын өндөр татвар оноосон билээ.

Тэгвэл өчигдөр Трамп хариу арга хэмжээгээ цуцлахгүй бол Хятад улсыг нэмж 50 хувийн татвараар шийтгэхээр сүрдүүлсэн байна.

Хэрвээ ингэвэл АНУ-д Хятадаас нийлүүлдэг бараа бүтээгдэхүүний импортын татвар 104 хувь болох юм.

Өмнө нь Хятадад 20 хувийн татвар оноогоод байсан бол Лхагва гарагт дахин 34 хувийн татвар нэмснээр нийтдээ 54 хувь болоод байгаа.

Хятадын тал хариуд нь АНУ-ын зарим бараа бүтээгдэхүүнд 34 хувийн импортын татвар оноосон юм.

Өчигдөр Вашингтонд суугаа Хятадын элчин сайдын яамны хэвлэлийн төлөөлөгч Лю Пэню сүрдүүлгийн хариуд “Хятад улсад дарамт шахалт үзүүлэх, сүрдүүлж заналхийлэх нь харилцах зөв арга биш. АНУ-ын ‘харилцан татвар’ нэрийн дор явуулж буй ноёрхогч бодлого нь бусад улс орнуудын хууль ёсны эрх ашгийг хохироож, өөрийн хувиа хичээсэн ашиг сонирхолд үйлчилж, олон улсын дүрмээс Америкийг дээгүүр тавьсан хэрэг болж байна. Энэ бол нэг талт үзэл, протекционизм, эдийн засгийн дээрэлхэлтийн ердийн нэг хэлбэр юм” гэж мэдэгджээ.

Трампын авсан арга хэмжээний дараа дэлхий дахинд эдийн засгийн хямрал нүүрлэх айдас нэмэгдэж, хөрөнгийн зах зээлүүдийн уналт үргэлжилж байна.

Өнгөрсөн долоо хоног нь АНУ-ын хөрөнгийн зах зээлийн түүхэнд 2020 оноос хойш тохиосон хамгийн хар өдрүүд байлаа.

Энэ уналт Даваа гарагт Азийн зах зээлд үргэлжилж, Хонконгийн Hang Seng индекс 13 хувиар буурсан нь 1997 оноос хойш тохиолдсон нэг өдрийн доторх хамгийн огцом уналт байв.

Дэлхийн улс орнуудын түрүүч яриа хэлэлцээний санал тавьж эхэлснийг Трамп өчигдөр Цагаан ордонд сэтгүүлчидтэй уулзахдаа мэдэгдсэн байна.

Тухайлбал тэр өчигдөр Израилийн ерөнхий сайд Бенжамин Нетаньяхутай уулзахдаа хоёр орны худалдааг тэнцвэржүүлэх асуудлыг хэлэлцжээ.

Трампын засаг захиргаа Лхагва гарагт Израиль улсад 17 хувийн импортын татвар оноосон юм.

Трамп бас Япон улсын засгийн газрын төлөөлөгчид хэлэлцээ хийхээр АНУ-д ирэх гэж байгааг сошиал хуудсаараа мэдээлсэн байна.

Европын Комиссын ерөнхийлөгч Урсула фон дер Ляйен өчигдөр АНУ-ын талд “импортын татвараа харилцан тэглэх” санал тавьжээ. Гэхдээ бас эрх ашгаа хамгаалахын тулд хариу арга хэмжээ авахад бэлэн байгаагаа давхар мэдэгдсэн байна.

Трамп уг мэдэгдлийн дараа “АНУ-ыг хохироох зорилгоор байгуулагдсан” гэж Европын Холбоог шүүмжилснээс харвал тохиролцоонд амархан хүрэхгүй бололтой.

Эх сурвалж: BBC