Ц.Уртнасан: Улаанбаатар хотын үнэрийн бохирдлыг тодорхойлох техникийн боломжийг бүрдүүлнэ

Гэрэл зургийг MPA агентлагийн онцгой зөвшөөрөлтэйгөөр ашиглав

Үнэрт нүүрс устөрөгч тодорхойлох суурин багаж, дагалдах тоног төхөөрөмжтэй болох талаар Байгаль Орчин, Уур Амьсгалын Өөрчлөлтийн Яам (БОУАӨЯ)-наас мэдээллээ. 

Нийслэл хотод

• агаар,
• ус,
• хөрс,
• дуу чимээ,
• үнэрийн бохирдол тулгамдсан асуудал болоод байна.

Дээрх асуудалтай холбогдуулан БОУАӨЯ-ны Төрийн нарийн бичгийн дарга Ц.Уртнасан Цаг уур, орчны шинжилгээний газрын харьяа Байгаль орчин, хэмжил зүйн төв лабораторид ажиллажээ. 

Тус лаборатори нь:

• Улаанбаатар хотын агаарын чанарыг 13 автомат суурин станц дээр зургаан үзүүлэлтээр
• Гадаргын болон хаягдал бохир усны хяналт шинжилгээг сар бүр 8-17 цэгт 10-23 үзүүлэлтээр,
• Хөрсөн дэх хүнд металлыг долоон үзүүлэлтээр
• Агрохимийн шинж чанарыг зургаан үзүүлэлтээр тодорхойлж, агаар, ус, хөрсний чанарын хяналт шинжилгээг хийдэг байна.

Гэвч агаар, ус, хөрс, дуу чимээ, үнэрийн бохирдлыг нарийвчлан тодорхойлох техникийн боломж бүрдээгүй байгааг онцолж, цаашид бохирдлыг шинжлэх ухааны үндэслэлтэй тодорхойлохын тул шинжилгээний тоо хэмжээ, нэр төрөл, чанар, цар хүрээг нэмэгдүүлэх, багаж төхөөрөмжийг шинэчлэх, олон улсын түвшинд хүргэх, инженер техникийн ажилтнуудыг чадавхжуулах зайлшгүй шаардлагатайг байгааг тус лабораторийн удирдлагын зүгээс танилцууллаа.

Түүнчлэн БОУАӨЯ-наас БНСУ-ын Эксим банкны хөнгөлөлттэй зээлээр хэрэгжиж буй “Байгаль орчны шинжилгээний төв лабораторийн чадавхыг сайжруулах МОН-21” төслийн хүрээнд лабораторийн барилга шинээр баригдаж, агаар, ус, хөрсөн дэх бохирдлыг 100-аас доошгүй үзүүлэлтээр тодорхойлох боломж бүрдүүлэхээр ажиллаж байгааг мэдээллээ.