Антарктидын алслагдсан баазад ажиллаж буй судлаачдын дунд “мөргөлдөөн” гарсан тухай мэдээлжээ

Антарктидын алслагдсан баазад байрлан ажиллаж буй судлаачдын дунд “мөргөлдөөн” гарсан тухай Өмнөд Африкийн хэвлэл мэдээлжээ.

Тус баазыг Өмнөд Африкийн Бүгд Найрамдах Улс (ӨАБНУ) ажиллуулдаг бөгөөд мөсөн тивийн эргээс 170 км-ийн гүнд, цаг уурын онцгой хүнд хэцүү нөхцөлд оршдог юм байна.

Тиймээс жилийн ихэнх хугацаанд тэнд ажиллаж буй судлаачид гадаад ертөнцөөс таслагдаж, битүүмжлэгдсэн дотор орчинд ажилладаг гэнэ.

Баазад ажиллаж буй нэг гишүүний гаргасан зохисгүй ааш авирын улмаас “мөргөлдөөн” гарсныг ӨАБНУ-ын засгийн газрын төлөөлөгч баталсан байна.

Тус улсын байгаль орчны яам болсон явдлын мөрөөр шуурхай арга хэмжээ аван ажиллаж байгааг бас мэдэгджээ.

Үүний улмаас судлаачид өөрсдийг нь баазаас буцааж татах хүсэлт ирүүлснийг Өмнөд Африкийн Сандэй Таймс сонин мэдээлсэн байна.

“Sanae IV” нэртэй уг баазад ажиллах хүмүүсийг илгээхээсээ өмнө сэтгэл зүйн нарийн шалгуураар оруулдаг ажээ.

Энэ нь тусгаарлагдсан орчинд цөөхүүлээ удаан хугацаанд ажиллахад сэтгэл санааны хувьд тэсвэр тэвчээртэй байж чадах эсэхийг нягтлах зорилготой юм байна.

Одоо тус баазад байрлаж буй судлаачдыг арванхоёрдугаар сард буцааж татах хуваарьтай байгаа ажээ.

1959 онд байгуулагдсан “Sanae IV” бааз нь 10 орчим хүний багтаамжтай. Ихэнхдээ нэг эмч, хоёр механикч, гурван инженер, нэг цаг уурын техникч, хоёр физикч гэсэн бүрэлдэхүүнтэй байдаг гэнэ.

Өнгөрсөн Ням гарагт баазын нэг гишүүн төвд ирүүлсэн цахим захидалдаа “нэг гишүүний ноцтой ааш авирын улмаас аюултай уур амьсгал үүсээд байгаа” тухай мэдээлсэн байна.

ӨАБНУ-ын албаны эх сурвалжийн мэдээлснээр судлаачдын ахлагчаас нэг гишүүнд өгсөн даалгавраас үүдэлтэй маргаанаас уг зөрчил үүссэн гэнэ.

Антарктидын судалгааны баазуудад зөрчил маргаан гарах явдал ховор байдаг. Хамгийн сүүлд 2018 онд Оросын эзэмшлийн Беллингхаузен баазын нэг гишүүн нөгөөгөө хутгалсан хэрэг гарч байжээ.

Удаан хугацаанд гадаад ертөнцөөс тусгаарлагдаж, цаг уурын хатуу ширүүн нөхцөлд хэт ойр амьдрах нь хүмүүсийн зан аашийг өөрчилдөг гэдэг.

“Ийм орчинд байгаа хүмүүс санаанд оромгүй жижиг учир шалтгаанаар зөрчилдөхөд тун ойрхон байдаг. Захирах, захирагдах харилцаа, ажлын ачаалал, хуваарь, чөлөөт цаг, хоолны дэглэм, хоолны порц хэмжээ зэрэг ямар ч жижиг асуудал том зөрчил болон тэсрэхэд бэлэн байдаг” гэж Британийн сэтгэл судлалын нийгэмлэгийн гишүүн, Бирмингэмийн Их сургуулийн ажлын байрны эрүүл мэнд, сэтгэл судлалын профессор Крэйг Жэксон тайлбарлажээ.

ӨАБНУ-ын эрх баригчдад мөс туулах чадвартай хөлөг онгоц, нисэх онгоц байдаг ч ямар нэг аврах ажиллагаа цаг уурын нөхцөл байдлаас ихээхэн хамаарахыг мэргэжилтнүүд хэлж байна.

Эх сурвалж: BBC