Канад улс АНУ-ын оноосон импортын татварын эсрэг ижил тэнцүү хариу арга хэмжээ авлаа

АНУ-ын ерөнхийлөгч Трампын зарласан ган, хөнгөн цагааны импортын 25 хувийн татвар өчигдөр буюу Лхагва гарагаас хэрэгжиж эхэлсэн юм.

Энэ арга хэмжээ нь тус улсын ган, хөнгөн цагааны хамгийн том нийлүүлэгч Канад улсын хувьд хүнд цохилт болж байгаа.

Тэгвэл Канадын эрх баригчид АНУ-ын авсан арга хэмжээний хариуд ижил тэнцүү хариу арга хэмжээ авч байгаагаа өчигдөр зарлажээ.

“Манай ган, хөнгөн цагаан үйлдвэрлэлийн нэр хүндтэй салбарын эсрэг шударга бус арга хэмжээ авсныг бид зүгээр хараад сууж чадахгүй” гэж Канадын сангийн сайд Доминик ЛеБланк мэдэгдээд тус улс “доллар бүрийг доллароор” тооцсон ижил тэнцүү хариу арга хэмжээ авч байгааг зарласан байна.

Тухайлбал өөрийн АНУ-д нийлүүлдэг 12.6 тэрбум канад долларын ган, 3 тэрбум канад долларын хөнгөн цагааны дүнтэй тэнцэх бараа бүтээгдэхүүнээс гадна нэмэлт 14.2 тэрбумын бараа бүтээгдэхүүнийг оролцуулаад нийтдээ 29.8 тэрбум канад долларын ($20 тэрбум) дүнтэй АНУ-ын бараанд импортын өндөр татвар оноожээ.

Уг татвар Пүрэв гарагийн шөнийн 12:01 цагаас хэрэгжиж эхлэх юм байна.

Канадын засгийн газрын хариу арга хэмжээд АНУ-ын компьютер, спортын тоног төхөөрөмж, цутгамал төмрийн бараа бүтээгдэхүүнүүд хамрагдах ажээ.

Канадын гадаад хэргийн сайд Мелани Жоли хоёр улсын худалдааны асуудлаар энэ долоо хоногт Квебект зохион байгуулагдах Их Долоогийн сайд нарын уулзалтын үеэр АНУ-ын төрийн нарийн бичгийн дарга Марко Рубиотой ярилцахаар төлөвлөж байгаагаа мэдэгдсэн байна.

Тэр бас Европын холбоотнууддаа АНУ-ын оноосон импортын татварын эсрэг хариу арга хэмжээ авахыг уриалжээ.

Америк-Канадын худалдааны дайн Канадын ерөнхий сайд Жастин Трюдог албан тушаалаасаа буух гэж байгаа цаг үетэй давхцаж байна.

Өнгөрсөн Ням гарагт болсон Либерал намын даргын сонгуульд Марк Карни ялснаар Канадын дараагийн ерөнхий сайд болж байгаа юм.

Даваа гарагт хийсэн мэдэгдэлдээ Карни ерөнхий сайдын тангараг өргөхөөсөө өмнө АНУ-ын ерөнхийлөгч Дональд Трамптай харилцахгүйгээ мэдэгдэж байв.

Энэ үеэр Трамп сошиал хуудсаараа Канадыг АНУ-ын 51 дэх муж болгох санааг давтан илэрхийлсэн юм.

“Канадын тусгаар тогтнол, бүрэн эрхэт байдлыг хүндэтгэж, хоёр орны худалдаанд нэгдсэн байр сууринаас ханддаг болсон цагт нь би Трамптай уулзах болно. Дэлхийн хамгийн том эдийн засаг, аюулгүй байдлын түншлэл шинэчлэгдэж, дахин нээгдэх нь бүгдэд ашигтай. Манай засгийн газар шинээр байгуулагдах ч байр суурь хэвээр байх болно” гэж Карни мэдэгджээ.

Эх сурвалж: Reuters