В.Энхтөр: Урт цагааны 107 автомашины далд зогсоол бүхий цэцэрлэгт хүрээлэнгийн барилга угсралтын явц 95%-тай байна

Урт цагааны цэцэрлэгт хүрээлэнгийн тохижилтын ажлын явцын талаар төслийг гүйцэтгэгч компанийн төлөөлөл өнөөдөр/2025.05.19/ мэдээлэл өглөө.

Төслийг гүйцэтгэгч “Бодь Пропертийз” ХХК-ийн төслийн менежер В.Энхтөр "Нийслэлийн хөрөнгө оруулалтаар хэрэгжүүлж буй Урт цагааны газар доорх авто зогсоолтой, дээр нь ногоон байгууламж болгож тохижуулах төслийн барилга угсралтын ажлын явц өнөөдрийн байдлаар 95%-тай үргэлжилж байна. 

Тавдугаар сарын 16-наас гацуур, нарс мод, бут сөөгийг тарьж эхэлсэн. Нийт талбайн 26.5%-ийг ногоон байгууламж эзлэх юм.

Жуулчдад зориулсан задгай театрын хэсгийг байгуулж, чанга ярих системийг угсарч дуусаад байна. 

Иргэдийг суухад зориулж шөнөдөө гоёмсог гэрэл асах сандлуудыг хийж голын хэсэгт мод тарьсан, зүлэгжүүлнэ. Цэцэрлэгт хүрээлэнгийн голд будант оргилуур, усан толио байх бол чулуун хавтан бүхий явган хүний замууд, зах хэсгээр саравчнууд хийх юм.

Ногоон байгууламж нь гарцтай. Өөрөөр хэлбэл иргэд далд зогсоолд машинаа байршуулж, уг гарцаар ногоон байгууламж руу орж, гарна.

107 автомашины багтаамжтай газар доорх дулаан авто зогсоол нь дөрвөн блокоос бүрдэх бөгөөд "Теди" худалдааны төв талаас орох бол "Найман шарга" тал руу гарах гарцтай. Гарааш руу орох гарц дээр дүүрсэн эсэхийг дэлгэц дээр харуулах системтэй.

Өдөрт 120-130 хүний бүрэлдэхүүнтэй ажиллаж байгаа бөгөөд багц нэг буюу гурван блок гарааш бүхий ногоон байгууламжийг долдугаар сард ашиглалтад оруулна.

Харин багц хоёр болох гурван давхар, худалдаа үйлчилгээний зориулалттай барилгыг есдүгээр сард ашиглалтад хүлээлгэж өгнө. Барилгын төмөр бетон цутгалтыг бүрэн хийж дууссан. Өнөөдрийн байдлаар нэгдүгээр давхрын шавар, өрлөгийн ажил үргэлжилж байна. Уг барилгын газрыг өнгөрсөн арваннэгдүгээр сард чөлөөлсөн юм" гэж танилцууллаа.

Урт цагааны гудамжинд орон нутгийн төсвийн 44.1 тэрбум төгрөгөөр далд зогсоол бүхий цэцэрлэгт хүрээлэнг байгуулахаар болж, худалдаа үйлчилгээний барилгуудыг нураан 1.3 га газрыг чөлөөлсөн билээ.