С.Батзориг: Урт цагаанд баригдаж буй гурван давхар барилга нь худалдаа, үйлчилгээ эрхэлж байсан хүмүүст зориулсан түрээсийн талбайтай

Урт цагааны гудамжинд орон нутгийн төсвийн 44 тэрбум төгрөгөөр байгуулагдаж байгаа автомашины далд зогсоолтой, цэцэрлэгт хүрээлэнгийн талбайд гурван давхар үйлчилгээний барилга баригдаж буй. Уг барилга нь худалдаа, үйлчилгээний түрээсийн талбайтай бөгөөд есдүгээр сард ашиглалтад оруулах юм байна.

Энэ тухай төслийн архитектурыг боловсруулсан "Интеллект тауэр" компанийн архитектор С.Батзориг "Цэцэрлэгт хүрээлэн нь газар доор авто зогсоолтой, дээрээ хүмүүс амарч суух талбай, усан оргилууртай. Тус талбайд баригдаж байгаа гурван давхар барилгад нийтийн бие засах газар, кафе, жуулчдад зориулсан мэдээллийн танхим, хуучин “Урт цагаан”-д үйлчилгээ эрхэлж байсан хүмүүст зориулсан худалдаа, үйлчилгээний түрээсийн талбайнуудыг төлөвлөсөн.

Нэрт архитектор Б.Дамбийнямын түүхэн дурсгалт барилгын суурин дээр хийж буй төсөл учраас ач холбогдол өгч, технологийн шинэ шийдлийг шингээхийг хичээсэн.

Архитектурын хийцийн хяналтыг долоо хоногт нэг удаа тавьдаг" гэв.

Өмнө нь "Бодь пропертийз" ХХК-ийн гүйцэтгэх захирал Б.Тэгшбаяр: Урт цагааны барилгыг буулгасан буурин дээр таван блок далд гарааш бүхий гурван давхар үйлчилгээний жижиг барилгыг барих юм.

Үйлчилгээний гурван давхар барилга нь 30х32 хэмжээтэй, нийт талбайн 10.1%-ийг эзэлнэ. Энэ нь жуулчдад зориулсан хөтчийн зориулалттай барилга" хэмээн мэдээлж байсан юм.

Харин Хотын дарга Х.Нямбаатар “Урт цагаан худалдаа, үйлчилгээний төвд үйл ажиллагаа эрхэлж байсан иргэд, аж ахуйн нэгжийн ажлын байрыг хадгалах үүднээс 32-ын тойрог орчимд ахуйн үйлчилгээний төвийн барилга барьж, орчныг нь тохижуулан, ногоон байгууламж хийнэ" гэж байсан ч Урт цагаанд дахин худалдаа үйлчилгээ эрхлэх бололтой.