Д.Пүрэв-Очир: Урт цагааны цэцэрлэгт хүрээлэн усан толио, будант оргилууртай. Долдугаар сард нээнэ
Нийслэлийн Чингэлтэй дүүргийн 3 дугаар хороонд байрлах нийслэлийн өмчийн III байр буюу “Урт цагаан” худалдаа, үйлчилгээний төвийн барилгыг 2024 оны нэгдүгээр сард нурааж, нэг га талбайд 196 автомашины далд зогсоолтой цэцэрлэгт хүрээлэн байгуулах ажлыг есдүгээр сард нь эхлүүлсэн байдаг. Цэцэрлэгт хүрээлэнгийн бүтээн байгуулалтыг гүйцэтгэх тендерт “Бодь Пропертийз” ХХК шалгараад буй.
Уг гудамжийг тохижуулах тендер нь 44.1 тэрбум төгрөгийн төсөвт өртөгтэй бөгөөд санхүүжилтийг орон нутгийн төсвөөс гаргах нөхцөлтэйгөөр зарлагдсан юм.
Тус компанийн ахлах инженер Д.Пүрэв-Очир бүтээн байгуулалтын ажлын явцын талаар "Урт цагаан төслийн барилга угсралтын ажил хоёр хэсэгтэй. Нийт төслийн төмөр бетон хийц болон автомашины далд зогсоолын ажил дуусаж байгаа бол үйлчилгээний барилгын гуравдугаар давхрын угсралтыг гүйцэтгэж байна.
Эхний ээлжид цэцэрлэгт хүрээлэн буюу дээрээ тохижилт бүхий автомашины далд зогсоолыг долдугаар сард нээнэ.
Цэцэрлэгт хүрээлэнд явган хүний зөөлөн болон хатуу зам, дугуйн зам, усан толио, будант оргилуур хийгдэж байгаа.
Харин гурван давхар үйлчилгээний барилгыг есдүгээр сард нийслэлд хүлээлгэж өгөхөөр ажиллаж байна" гэж мэдээллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
