Өөрийнхөө алтан хөшөөтэй Газын зурвасын ирээдүйг харуулсан видео дүрсийг Трамп сошиал хуудсандаа нийтлэв

АНУ-ын ерөнхийлөгч Дональд Трамп өчигдөр Газын зурвасыг ирээдүйг хиймэл оюуны технологиор бүтээж харуулсан видео дүрсийг өөрийн сошиал хуудсандаа нийтэлжээ.

Тэрбээр 15 сарын турш Израилийн армид бөмбөгдүүлсэн энэ газраас палестинчуудыг албадан нүүлгэж, аялал, жуулчлалын тусгай бүс болгон хөгжүүлэх санааг өнгөрсөн сард анх удаа гаргаж байв.

Ингэхдээ тэр Газрын дундад тэнгисийн эргийн энэ зурвас газрыг "Ойрх Дорнодын Ривиера" болох ирээдүйтэйг илэрхийлж байлаа.

33 секундийн урт хэмжээтэй, “Gaza 2025 What’s Next?” гэсэн гарчигтай уг видео дүрс дээр тэр өөрийнхөө алтан хөшөөг палестинчуудын нутагт сүндэрлэж байгаагаар харуулжээ.

Мөн Израилийн ерөнхий сайд Бенжамин Нетаньяху, Трамп хоёр далайн эрэг дээр наранд биеэ шарж байгаа, тэрбумтан Илон Маск мөнгөөр бороо оруулан бүжиглэж байгааг харуулсан байна.

Видео дүрсэнд оруулсан дуу нь “Дональд ирснээр та бүхэн чөлөөлөгдөнө, гэрэл үзэх болно”, “Газын номер нэг хүн Трамп” гэх мэт магтаалын үгстэй байгаа юм.

Палестинчуудыг нүүлгэн шилжүүлэх төлөвлөгөөг нь Йордан, Египет зэрэг улсууд хүчтэй эсэргүүцсэний дараа Трамп байр сууриа зөөлрүүлж, үүнийг зөвхөн өөрийн “зөвлөгөө” байсан мэтээр ярих болжээ.

Хүмүүс Трампын тараасан дүрсийг янз бүрээр хүлээн авч байна.

Зарим нь түүнийг ийм зүйл нийтэлсэнд итгэхгүй, хакеруудын үйлдэл байж магадгүй гэж сэжиглэжээ.

Трамп болон түүний төлөөний хүмүүс энэ талаар ямар нэг тайлбар өгөөгүй байна.

Газын зурвасыг сэргээн босгох зардал $53 тэрбумыг давах тооцоог НҮБ гаргасан байдаг.

Палестины Хамас зэвсэгт байгууллага болон Израилийн засгийн газрын хооронд байгуулсан гал зогсоох гэрээ нэгдүгээр сарын 19-нөөс эхлэн хэрэгжиж байгаа.

Үүний үр дүнд Газын зурваст хүмүүнлэгийн тусламж хүргэх ажил эрчимжсэн юм.

Эх сурвалж: AFP