"Том хувийн хэвшилтэйгээ төр хамтарч, жижиг ААН-үүдийн авто зогсоолын үйл ажиллагааг таслан зогсоож байна"
Моннис групп нийслэлийн бүх зогсоолыг авч иргэд, Аж Ахуйн Нэгж (ААН)-үүдийг хохироож байгаа асуудлаар авто зогсоолын үйл ажиллагаа эрхлэгчид "Үндэсний мэдээллийн төв"-д өнөөдөр хэвлэлийн хурал зарлалаа.
"Хууль тэгш үйлчлээгүй, хувийн хэвшил биднийг мэдээллээр хангаагүй"
Авто зогсоолын үйл ажиллагаа эрхлэгчид "Бид стандартыг мөрдүүлж, хууль журмын дагуу үйл ажиллагаагаа хэвийн явуулж буй төлбөртэй зогсоол эрхлэгч нар байна.
Гэрээний үүргээ огт зөрчиж байгаагүй, татвар, хураамжаа төлөөд хууль ёсны дагуу ажиллаж өнөөг хүрсэн.
Гэтэл 2024 оны арванхоёрдугаар сарын 31-нд буюу шинэ жилийн баярын өдөр зогсоолын үйл ажиллагаа эрхлэх гэрээг цуцлах захирамж ирүүлсэн байдаг.
"Гэрээгээ дахиж сунгахгүй учраас одоо газраа чөлөөлж өгнө үү" гэдэг мэдэгдэл ирүүлсэн гэсэн үг. Улмаар газар чөлөөлж өгөх шаардлагыг хэдхэн хоногийн дараа тавьсан.
Улаанбаатар хотын түгжрэлийг бууруулах үүднээс 50 зогсоолыг жишиг зогсоол болгоно. Үүнийг хэрэгжүүлэхийн тулд та нартай байгуулсан гэрээг цуцалж байна гэх мэдэгдэл ирсэн байгаа. Ингэхдээ нийслэлийн Засаг даргын сонгон шалгаруулалтаар Моннис группийн охин компанид 100 хувь давуу эрх байдлаар олгосон.
Хэрэв сонгон шалгаруулалтын талаар нээлттэй мэдээлэл байсан бол оролцох л байсан. Хууль тэгш үйлчлээгүй, хувийн хэвшил биднийг мэдээллээр хангаагүй.
Том хувийн хэвшилтэйгээ төр хамтарчихдаг юм байна. Бид нар шиг жижиг зогсоол эрхлэгч нартай төр хамтарч ажилладаггүй, хууль үйлчилдэггүй юм байна" гэлээ.
"Тууштай, хөдөлмөрчөөр ажиллаад явж буй жижиг ААН, иргэдийнхээ ажлыг дээрэмддэг"
Үргэлжлүүлэн "Жижиг ААН, энгийн иргэд нэгдсэн дүрэм, журмын дагуу үйл ажиллагаа явуулах зөвшөөрлөө авч, гэрээ хийдэг. Бид нар төлбөртэй зогсоолын үйл ажиллагааг гэрээнийхээ дагуу явуулж ирсэн.
Тууштай, хөдөлмөрчөөр ажиллаад явж буй жижиг ААН, иргэдийнхээ ажлыг дээрэмддэг. Хаана ч бай ашигтай гэж үзсэн газар руугаа том компаниуд ордог хандлагыг болимоор байна.
Эзэнгүй байсан газрыг авч төлбөртэй зогсоол болгон үйл ажиллагааны хувьд тавигдах шаардлага, камер болон бусад стандартын дагуу байршуулах автомат тоног төхөөрөмж, тоолуурын систем зэрэг хамгийн дэвшилтэт гэх бүх үйлчилгээг нэвтрүүлж үйл ажиллагаа эхэлсэн. Энэ бүгдийг гэрээний дагуу хийдэг.
Ийм асуудал зөвхөн авто зогсоол биш бүх салбарт ажиглагдаад буй" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
