Цагаан сарын үеэр менингококкт халдварын оргил үе таарах тул амны хаалт зүүхийг ЗӨВЛӨВ
Менингококкт халдвараас урьдчилан сэргийлэх зөвлөмжийг Халдварт Өвчин Судлалын Үндэсний Төв (ХӨСҮТ)-өөс танилцууллаа.
Хаврын улиралд менингококкт халдварын дэгдэлт эрчимждэг талаар ХӨСҮТ-ийн нэгжийн дарга Н.Сувдмаа ярьж, дараах зөвлөмжийг хүргэв.
Тэрбээр хэлэхдээ "Амьсгалын зам болон бусад зонхилон тохиолдох халдварт өвчнүүдийг манай улс 1950-аад оноос эхлэн хөдлөл зүйгээр нь танддаг болсон. Ингэхдээ долоо хоног, нас, улирал, хөдлөл зүйгээр нь тандаж байна.
- Хаврын улиралд амьсгалын замын халдвар
- Зуны улиралд гэдэсний халдварын эрсдэл нэмэгддэг.
Менингококкт халдварын гол анхаарах зүйл нь хөдлөл зүй. Энэ төрлийн өвчлөл 5-6 жилийн зайтай дэгддэг.
Дэлхий дахинд жил бүр 100,000-500,000 хүртэлх тохиолдол бүртгэгдэж байна. Гэхдээ тодорхой хугацааны дараа дэгдэлт байдлаар олон хүнийг хамруулах эрсдэлтэй өвчин. Манай улсын 2007, 2013, 2019 оны үед олон хүнийг өвчлүүлсэн.
Менингококкт халдварын хөдлөл зүйг сараар нь авч үзвэл:
Илүү оргил үе нь гурав, тавдугаар сар байсныг сүүлийн 10 жилийн хөдлөл зүйгээс харах боломжтой.
Удахгүй уламжлалт цагаан сарын баяр болох гэж байна. Иргэд баталгаатай эх сурвалж, мэргэжлийн төв байгууллагаас өгч байгаа зөвлөмжийг амьдрал ахуйдаа хэвшил болгохыг зөвлөе.
Урьдчилан сэргийлэх зөвлөмжүүдийг байнга дагаж мөрдөх хэрэгтэй. Хамгийн түрүүнд амны хаалтыг зөв газартаа зүүж, зөв зохистой хаях хэрэгтэй. Хоёрдугаарт хоолойгоо зайлах арга маш том ач холбогдолтой" хэмээн ярилаа.
Хоолой зайлах зөвлөмж:
- Хоолойг зайлахдаа төрөл бүрийн уусмал хэрэглэж болно. Сода, буцалсан бүлээн ус, давс, царван, нимбэгээр ч уусмал бэлдэж хоолой, амаа зайлж болно.
- Долоо хоног бүр нэг төрлөөр зайлаад дараагийн удаа зайлахдаа уусмалынхаа төрлийн сольж байх ёстой.
- Хоолой зайлахдаа эрүүл ахуйн дэглэмийг сайтар сахин, хүн тус бүр хоолой зайлах савтай байх ёстой.
Зөвлөгөө:
- Бага насны хүүхдүүд эрсдэлт бүлэгт хамаарна. Хүний дархлааны систем болон хэр хоруу чанартай өвдөж байгаагаас хамаарч менингитийн халдвар эрчимтэй явна.
- Бүх насныхан өвдөх эрсдэлтэй. Гэхдээ өмнөх тохиолдлуудаас ажиглахад тав хүртэлх насны хүүхдүүд илүү хүндээр өвдөж байна.
- Менингококкийн халдварын гол онцлог нь өндөр халуурах шинж тэмдгээр илэрдэг. Халууны эм уулгаад түр буусан ч буцаад 39, 40 хэм хүртэл маш өндөр халуурдаг.
- Насанд хүрэгчид гаднаас халдварын нянг тээж, бага насны хүүхдүүдэд дамжуулах тохиолдол бий. Иймд томчууд гэртээ ороод гадуур хувцсаа тайлж, хоолой амаа зайлаад, ариун цэврээ сахисны дараа бага насны хүүхэдтэйгээ харьцахыг зөвлөе.
Шинж тэмдэг:
- 38-42 хэм хүртэл гэнэт өндөр халуурах
- Халууны эмэнд буухгүй байх
- Богино хугацаанд дахин өндөр халуурах
- Бие сулрах, дотор муухайрах
- Бөөлжих, уур уцаартай хэт цочимхой эсвэл номой болох
- Царай цонхийх зэрэг шинж тэмдэг илэрдэг.
Цусархаг тууралт нь өвчин эхэлснээс хойш 12 цагийн дотор гарна. Хэрэв өвчин хүнд явцтай байвал үхжилт тууралт 4-6 цагийн дотор гардаг. Маш богино хугацаанд хүндэрч, эндэгдэлд хүргэдэг байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
