Удахгүй дэлхийн дагуул саран дээр анхны дата төв ажиллаж эхэлнэ

АНУ-ын Lonestar Data Holdings компани дэлхийн дагуул саран дээр анхны дата төвийг байгуулахаар ажиллаж байна.

Тус компани энэ сард багтаан SpaceX компанийн Falcon 9 пуужингаар дата төвийн бүрэн системийг багтаасан газардагч станцаа сансарт хөөргөх юм.

Сарны дата төв нь хөргөх зардал багатай тул зөвхөн нарны эрчим хүчээр ажиллах ажээ.

Дэлхий дээр дата төв ажиллуулахад хөргөлтийн зардал асар өндөр байдаг. Ялангуяа хиймэл оюуны хэрэглээ хурдтай өсөж буй энэ үед дата төвүүдийн эрчим хүчний хэрэглээ улам нэмэгдэж байгаа.

“Дэлхийн хамгийн том дагуул дээр зангуугаа хатгах нь мэдээллийн аюулгүй байдлыг хангахад хангалттай юм” гэж Lonestar компанийн гүйцэтгэх захирал Крис Стотт хэлжээ.

Өөрөөр хэлбэл сарны дата төв нь эхний ээлжинд хугацааны хоцрогдлоос хамааралгүй хэрэглээнүүд, тухайлбал дэлхий дээр ажиллаж буй дата төвүүдийн нөөц, хуулбар байдлаар ашиглагдах боломжтой гэнэ.

Lonestar компани Флорида мужийн захиргаа, Британийн харьяаны Аил оф Ман (Isle of Man) арлын захиргаа, хиймэл оюуны технологийн Valkyrie компани, “Imagine Dragons” поп рок хамтлагт дата төвийн үйлчилгээ үзүүлэх гэрээ байгуулаад байгаа ажээ.

Freedom нэртэй сарны дата төвийг бас Флорида мужийн Тампа хотод байрладаг Flexential компанийн дата төвийн нөөц байдлаар ашиглах юм байна.

Сүүлийн жилүүдэд сансрын уудамд дата төв байгуулах сонирхол улам нэмэгдэж байгаа.

Арванхоёрдугаар сард энэ чиглэлд ажилладаг Lumen Orbit компани зах зээлийн үнэлгээгээ $40 саяар тооцож, $11 саяын хөрөнгө оруулалт татаж чаджээ. Lonestar компанийн хувьд $30 саяын үнэлгээнд үндэслэн $10 сая орчмын хөрөнгө оруулалт татсан байна.

Гэхдээ сансарт дата төв байршуулах нь засвар үйлчилгээ явуулахад хэцүү, шинэчлэх боломж хязгаарлагдмал, пуужин хөөргөх зардал өндөр зэрэг бэрхшээлүүдтэй.

Мөн пуужинд тээвэрлэн хөөргөхөд осолдох эрсдэл өндөртэй байдаг.

“Хиймэл дагуул сансарт хөөргөх нь хоёрхон хувилбартай. Бүтэлгүйтвэл бүрмөсөн дуусна. Сэргээх болон засварлах ямар ч арга байхгүй” гэж сансар судлалын Quilty Space компанийн гүйцэтгэх захирал Крис Килти хэлжээ.

Эх сурвалж: Reuters