Франц улсын ерөнхийлөгч асан хөлдөө цахим гав зүүж эхэллээ

Баасан гарагт өөрийг нь авлига, албан тушаалын хэрэгт буруутгасан шүүхийн шийдвэрийг давж заалдаад ялагдсаны дараа Франц улсын ерөнхийлөгч асан Николас Саркози хөлдөө цахим гав зүүж эхэлжээ.

Ингэснээр тэр өдөр бүрийн оройн 8 цагаас өглөөний 8 цаг хүртэл хугацаанд Парис дахь гэрээсээ гарах эрхгүй болж байна. Гэхдээ долоо хоногийн гурван өдөр оройн 9:30 хүртэл гарах тусгай нөхцөл нэмж олгосон нь өөр нэг хэрэгтэй холбоотой шүүх хуралд Саркозийг оролцуулахын тулд авсан арга хэмжээ ажээ.

Тэрбээр одоо сонгуулийн үйл ажиллагаагаа Ливийн дарангуйлагч агсан Муаммар Каддафигийн хууль бус мөнгөөр санхүүжүүлсэн хэрэгт шалгагдаж байгаа юм.

Хэрвээ Саркози дээр заасан гэрийн хорионы хугацааг зөрчвөл цагдаагийн байгууллагад дохиолол бүртгэгдэх гэнэ.

Саркози ерөнхийлөгчийн албан тушаалаас буусныхаа дараа буюу 2014 онд өөртэй нь холбоотой авлигын хэргийг шалгаж байсан шүүгчийг хахуульдахыг оролдсон шалтгаанаар гэрийн хорионд орж байгаа юм.

Тэрбээр эхлээд 2021 онд энэ хэргийнхээ төлөө гурван жил шоронд хоригдох, хоёр жилийн тэнсэн харгалзах ял сонсож байв. Гэхдээ хорих ялын нэг жилийг нь гэрийн хориогоор солих боломжийг шүүх түүнд олгож байжээ.

Уг шийдвэрийг давж заалдаад ялагдсан тул Саркози өчигдрөөс цахим гав зүүж эхэлсэн байна.

Францын түүхэнд тэр цахим гав зүүсэн анхны ерөнхийлөгч асан болж байгаа юм.

Саркози 2007-оос 2012 оны хооронд Франц улсын ерөнхийлөгчөөр ажиллаж байв.

Авлига, албан тушаалын хэргийн мөрдлөг нь 10 жил үргэлжилсний эцэст ийнхүү шийдвэрлэгдэж байна. Одоо түүний сонгуулийн кампанит ажилдаа Ливийн дарангуйлагч агсан Каддафигаас олон сая евро авсан хэргийг шүүх ажиллагаа эхлэх юм.

Эх сурвалж: AFP