"Трамвай төслийг хэрэгжүүлэхэд Монгол Улсын Замын хөдөлгөөний дүрэмд өөрчлөлтүүд оруулах зохицуулалттай"

Улаанбаатар хотын түгжрэлийг бууруулах зорилгоор трамвай төслийг хэрэгжүүлж буй. Уг төслийн нэгдүгээр шугамын тендерийг дөрөвдүгээр сард багтаан зарлаж, тавдугаар сард сонгон шалгаруулалтыг, зун барилга угсралтын ажлыг эхлүүлэх юм байна. Эхний ээлжид нэгдүгээр шугамын бүтээн байгуулалтыг нийслэлийн төсвийн хөрөнгөөр барих аж.

Улаанбаатар трамвай төслийн эхний буюу нэгдүгээр шугамын эхлэл цэг дээр очиж ажиллах үеэр хотын дарга Х.Нямбаатар “Трамвай төслийн эхний шугам “Steppe arena”-аас Сүхбаатарын талбай хүртэл үргэлжилнэ. Трамвайны шугамын нийт урт нь 15 километр үргэлжилнэ. Архивын Ерөнхий Газрын урд талд трамвай явах эхлэл цэг байх юм. Эндээс авто замын голын ногоон байгууламжийн хэсгээр трамвайг явуулахдаа одоо байгаа авто замын эгнээг хязгаарлахгүйгээр шугамыг барихаар төлөвлөсөн. Нисэхийн уулзварыг олон түвшний болгоно. Эхний шугамын ТЭЗҮ боловсруулах ажил 50 орчим хувьтай байгаа, дууссаны дараа олон улсын нээлттэй тендерийг зарлана. Трамвай төслийг хэрэгжүүлэхэд Монгол Улсын Замын хөдөлгөөний дүрэмд өөрчлөлтүүд оруулах зохицуулалттай.

Төслийн нэгдүгээр шугамын тендерийг дөрөвдүгээр сард багтаан зарлаж, тавдугаар сард сонгон шалгаруулалтыг, зуны улиралд барилга угсралтын ажлыг эхлүүлнэ.

Трамвайны хоёрдугаар шугам нь Сүхбаатарын талбай-Зунжин чиглэлд төлөвлөгдсөн байгаа. Хоёрдугаар шугамын хөрөнгө оруулалтыг нэн хөнгөлөлттэй зээлээр санхүүжүүлэх бөгөөд ТЭЗҮ боловсруулах ажлыг нийслэлийн Зураг төслийн хүрээлэн гүйцэтгэж байгаа бол газар чөлөөлөлтийг хавар эхлүүлнэ. Трамвайн төсөлд төр, хувийн хэвшлийн түншлэл мөн чухал байна” гэв.

Трамвай нь авто замтай давхцахгүй. Зөвхөн гэрлэн дохиотой уулзвар дээр авто замын сүлжээтэй огтлолцдог. Нийслэлийн зүгээс Архивын ерөнхий газраас урагш 90 га талбайг трамвайн депогийн зориулалтаар бэлтгээд байгаа юм. Трамвай нь метроны төслөөс эдийн засгийн хувьд 10 дахин бага өртөгтэй, хоёр дахин бага цаг хугацааг зарцуулж, харьцангуй богино хугацаанд баригддаг. Эрчим хүчний хэмнэлттэй, байгаль орчинд ээлтэй. Нэг удаад 150-300 хүнийг тээвэрлэх боломжтой. Яармагаас Сүхбаатарын талбай хүртэл трамвайгаар явахад 20-30 минутад хүрнэ гэж тооцоолсон. Ингэснээр замын хөдөлгөөний дундаж хурдыг 25.7 хувиар нэмэгдүүлэх ач холбогдолтой гэж танилцуулсан юм.

Түүний мэдээлснээр трамвайны нэгдүгээр шугамыг 120 мянгатын уулзвар буюу Тэмээтэй хөшөөнөөс хойш гаргахад хүндрэлтэй байгаа аж.