Герман улс Оросын газрын тосыг тээвэрлэж яваад гэмтсэн хөлгийг аврахаар ажиллаж байна

Өрнөдийн хориг арга хэмжээг зөрчин Оросын газрын тосыг тээвэрлэж явсан “сүүдрийн флот” гэгчийн хөлөг Пүрэв гарагаас Баасан гарагт шилжих шөнө Германы эргийн ойролцоо Балтийн тэнгисийн усанд гэмтлийн улмаас саатжээ.

274 метр урт “Eventin” нэртэй уг хөлөг Оросоос Египет рүү бараг 100,000 тонн газрын тос тээвэрлэж явсан байна.

Хөлгийн хөдөлгүүр гэмтсэн тул жолоодлогоо алджээ. Тээвэрлэж яваа газрын тос нь тэнгисийн усанд асгарвал байгаль орчинд асар их хохирол учруулах эрсдэлтэй тул Германы тал хөлгийг аврах ажиллагааг Бямба гарагт эхлүүлсэн байна.

Орос улс Өрнөдийн хоригийг зөрчихдөө “техникийн хувьд найдваргүй хөлөг” ашиглаж, Европын аюулгүй байдалд заналхийлж байгааг Германы гадаад хэргийн сайд Анналена Баербок шүүмжилжээ.

Германы гурван хөлөг одоо Eventin хөлгийг эргээс холдуулж, аюул багатай тэнгисийн задгай хэсэгт шилжүүлэхээр зүүн хойд зүгт чирч байгаа юм байна.

Аюулгүй байдлын үүднээс хөлгийг цагт 2.5 км хурдаар алгуур чирч байгааг Германы эргийн хамгаалалтын алба мэдээлжээ.

Ойрын үед Балтийн тэнгист шуурга дэгдэж, давлагааны өндөр 2.5 метр хүрэх төлөвтэй байгаа тул хөлгийг ингэж удаан зөөж байгаа юм байна.

Одоогоор хөлгийн тээвэрлэж байгаа газрын тос тэнгисийн усанд асгарсан тохиолдол илрээгүй байгаа ажээ.

Панамын далбаан дор хөвдөг Eventin хөлгийг Германы эрх баригчид Өрнөдийн хоригийг зөрчин хулгайгаар газрын тос тээвэрлэдэг Оросын “сүүдрийн флот” гэгчийн нэг хэсэг гэж үзэж байна.

“Путин зэвэрч муудсан хөлгөөр хоригийг зөрчөөд зогсохгүй, осол гарсан тохиолдолд Балтийн тэнгисийн аялал жуулчлалыг зогсонги байдалд оруулах боломжийг тооцоолсон байна” гэж сайд Баербок мэдэгджээ.

Украины дайны улмаас Өрнөдийн хориг арга хэмжээгээр шийтгүүлсэн Орос улс газрын тосны орлогоо алдахгүйн тулд нэр хаяг, эзэмшлийг нь сольж төөрөгдүүлсэн хөлөг онгоцнуудаар хулгайн тээвэрлэлт явуулж байгаа.

Сүүлийн үед Өрнөдийн орнууд ийм үүрэг гүйцэтгэдэг “сүүдрийн флот”-ын хөлгүүдийн эсрэг арга хэмжээ авч эхлээд байна.

Европын Холбоо дангаараа 70 гаруй ийм хөлгийг хар жагсаалтдаа нэмсэн бол АНУ болон Их Британи 180 орчим хөлгийг хар жагсаалтдаа нэмж байгааг Баасан гарагт зарлажээ.

Эх сурвалж: AFP