Гал түймэрт шатаж буй Лос-Анжелесын агаарын чанар анх удаа Улаанбаатарынхтай ижил түвшинд хүрэв

Энэ долоо хоногийн Мягмар гарагт АНУ-ын Калифорни мужийн нутагт ой хээрийн түймэр гарсан нь хүчтэй салхины улмаас тус улсын хоёр дахь том хот Лос-Анжелесыг нөмөрч эхлээд байна.

Өнгөрсөн хэд хоногийн хугацаанд Лос-Анжелес хотын дотор болон гадна оршдог 1,900 гаруй барилга байгууламж шатаж, 130,000 орчим хүнийг нүүлгэн шилжүүлэх арга хэмжээ авсан юм.

Олон сар хур тунадас ороогүй, хуурай цаг агаартай байсан нь түймрийн тархалтыг улам нэмэгдүүлж байна.

Лхагва гарагийн орой Холливүүдийн толгодод түймэр хүрсний улмаас олон алдартны өндөр үнэтэй орд харшууд шатжээ.

Тэдгээрийн дотор Билли Кристал, Мэнди Мүүр, Парис Хилтон зэрэг алдартнууд байна.

 

Холливүүдэд энэ долоо хоногт болох байсан шагнал гардуулах гурван арга хэмжээ цуцлагдсан бол ирэх долоо хоногт Оскарын шагналын нэр дэвшигчдийг зарлах ажиллагааг хойшлуулжээ.

Швейцарын агаарын чанарын мэдээлэл боловсруулагч IQAir компаниас гаргадаг дэлхийн хамгийн өндөр бохирдолтой 10 хотын жагсаалтад саяхан Лос-Анжелес хот анх удаагаа орсон байна.

Хэдхэн цагийн өмнө тус хотын агаарын чанар IQAir-ийн AQI хэмжүүрээр гурван цагийн турш 150 давсан юм.

 

Лос-Анжелес хотын сүүлийн 24 цагийн агаарын дундаж чанар

Ингэснээр тус хот Энэтхэг, Пакистан, Бангладеш зэрэг улсуудын хотуудтай цуг дэлхийн хамгийн их агаарын бохирдолтой 10 хотын нэг болсон байна.

Энэ үед Улаанбаатарын үзүүлэлт 116 орчим буюу харьцангуй сайн чанартай байжээ.

Гэхдээ сүүлийн 30 өдрийн өдөр бүрийн дундаж AQI үзүүлэлтийг харвал 18 өдөрт нь өнөөдрийн Лос-Анжелесын түвшинтэй тэнцүү буюу илүү муу чанартай байжээ.

 

Улаанбаатарын сүүлийн 30 өдрийн агаарын дундаж чанар

Арванхоёрдугаар сарын 15-ны өдөр Улаанбаатарын агаарын чанарын үзүүлэлт 215 хүрсэн нь сүүлийн 30 өдрийн хамгийн өндөр бохирдол болсон байна.

Эндээс Улаанбаатарын агаарын чанар гамшгийн хэмжээнд хүрсэн нь харагдаж байгаа юм.

Эх сурвалж: IQAir