Н.Учрал: Уран төслийн хэлэлцээрийн явцад ажилчдын дундаж цалингийн хэмжээг 7-12 сая төгрөг байхаар ярилцсан

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын намрын ээлжит чуулганы өнөөдрийн хуралдаанаар Дорноговь аймгийн Улаанбадрах суманд байрлах Зөөвч-Овоо ураны ордын хөрөнгө оруулалтын гэрээний асуудал буюу “Стратегийн ач холбогдол бүхий ашигт малтмалын ордын төрийн эзэмшлийн хувь, хэмжээг орлуулах тухай” УИХ-ын тогтоолын төслийг хэлэлцэж байна. 

Энэ үеэр ураны төслийг удирдаж буй "Бадрах энержи” ХХК-ийн хөрөнгө оруулагч Орано Майнинг САС компанитай байгуулах хөрөнгө оруулалтын гэрээний зарим зүйл заалтын талаар гишүүд болон ажлын хэсгийн ахлагч дараах байр суурийг илэрхийлэв.

УИХ-ын гишүүн О.Батнайрамдал: "Орано Майнинг" САС компанитай байгуулах хөрөнгө оруулалтын гэрээний төсөл сайн болсон байсан. Энэ гэрээний дараа хоёр томоохон буюу хувь нийлүүлэгчдийн болон орд ашиглалтын гэрээ байгуулагдана. 

Гэрээнд зааснаар жилийн худалдан авалтын үнийн дүнгийн 40-өөс доошгүй хувь нь Монгол Улсад бүртгэлтэй татвар төлөгч хуулийн этгээд байна гэж заасан. Ураны уурхай 2060 он хүртэл урт хугацаанд явна. Тиймээс 40 хувийг нь урт хугацаанд 2060 он гэхэд 80 хувьд хүргэж чадвал аль аль талдаа харилцан ашигтай. 

Бид 10 хувийн давуу эрхийн хувьцаатай байна. Алтан хувьцааны хамгийн үндсэн зарчим нь хориг тавих эрхийг авч буйгаараа сайшаалтай. Хамгийн гол нь стратегийн ач холбогдол бүхий зайлшгүй оролцох ёстой хувь хэмжээ өөрчлөгдөхийн бол тусгай зөвшөөрлийг шилжүүлэх, барьцаалах, баталгаа гаргах, нэмэлт өөрчлөлт оруулахад хориг тавих эрх байгаа юм.

“Бадрах энержи” ХХК-ийн төлөөлөн удирдах зөвлөл нь 10 гишүүнтэй байна гэсэн. Үүний гуравны нэг нь бие даасан гишүүн байх бөгөөд 1-2 гишүүн нь Монгол Улсын иргэн байвал аль аль талдаа хэрэгтэй. Бие даасан гишүүнийг хольж оруулбал ашигтай болно. 

ЗГХЭГ-ын дарга Н.Учрал: Энэхүү хөрөнгө оруулалтын гэрээний гол онцлог нь орон нутгийг дэмжих, хүний нөөцийг бүрдүүлэхэд чиглүүлж тодорхой тусгасан. Цалин хөлсийг хүний нөөцийн шударга байдлаар авахгүй бол гаднаас ирсэн хүмүүс өндөр, дотоодынх нь бага цалинтай гэх тэгш бус байдал үйлчлээд байдаг. 

Ураны төслийн хугацаанд 1,600 хүнээс 17 нь гаднын ажилчид байна. Мөн 1.7 тэрбум ам.долларын худалдан авалтыг ханган нийлүүлэлтээс авах тооцоолол гарсан. 

Орон нутагт төслийн нийт хугацаанд татвар хураамж, ус болон газрын төлбөрт нэг тэрбум ам.долларын орлого бүрдэхээр санхүүгийн тооцоолол хийсэн. Ураны төслийн гэрээний хэлэлцээрийн явцад ажилчдын дундаж цалингийн хэмжээг 7-12 сая төгрөг байхаар ярилцсан. 

Ажлын хэсгийн дарга Б.Пүрэвдорж: Оюутолгойн төсөлд манай талаас төлөөлөн удирдах зөвлөлийн гурван гишүүн байгаа. Гэвч тэд Монголын талыг бүрэн дүүрэн төлөөлж чадаж байгаа эсэхэд асуудал гардаг. 10 хувийн давуу эрхийн хувьцааг авч байгаа боловч хамгийн гол нь олон асуудалд хориг эрхээ авсан. 

Монголчуудыг төлөөлөн удирдах зөвлөлд илүү оруулах талаар хэлэлцээрийн явцад тусгаж өгнө. Хамгийн гол нь төлөөлөн удирдах зөвлөлийн гишүүн Монголын талыг маш төлөөлөх ёстой. 

ШУУД ҮЗЭХ: