Төвдөд болсон газар хөдлөлтийн үеэр амиа алдсан хүний тоо 126 хүрэв

Өчигдөр буюу Мягмар гарагийн өглөөний 9:00 цагийн үед Төвдийн нутагт 7.1 магнитудын хүчтэй газар хөдөлснийг АНУ-ын геологийн судалгааны алба мэдээлжээ.

Дэлхийн ноён оргил Эверестийн бэлд болсон энэхүү газар хөдлөлтийн чичиргээ хөрш Энэтхэг, Балбад бас мэдрэгдсэн байна.

Гамшгийн улмаас 126 хүний амь үрэгдэж, 188 хүн бэртэж, 1,000 гаруй байшин барилга нурсныг Хятадын төв хэвлэл мэдээлжээ.

Шөнөдөө Цельсийн -16 хэм хүрч буй хүйтэн цаг агаарт нурангид дарагдсан хүмүүсийг аврах томоохон ажил Төвдийн Тингри хошууны Шигаце хотод үргэлжилж байна.

Газар хөдлөлтийн дараа цөөн хэдэн цагийн дотор нийтдээ 40 гаруй чичиргээ хэмжигч станцуудад бүртгэгджээ.

 

Хятадын төрийн төв хэвлэл газар хөдлөлтийн хүчийг арай багаар буюу 6.8 магнитуд гэж мэдээлсэн байна.

Газар хөдлөлтийн төв цэг Тингри хошуу нь Эверестийн бэлд оршдог тул олон улсын уулчдын зорьдог газар юм.

800,000 хүн оршин суудаг Шигаце хот орчмын газар бол Төвдийн шарын шашны гол хүмүүсийн нэг Панчин ламын нутаг ажээ.

Хималай орчмын бүс нутаг нь Энэтхэгийн болон Евразийн тектоник хавтангуудын уулзвар тул газар хөдлөлтийн идэвхтэй бүсэд багтдаг. Гэхдээ өчигдрийн газар хөдлөлт сүүлийн жилүүдэд Хятадад тохиогоогүй томоохон байгалийн гамшигт тооцогдож байна.

Хятадын төрийн тэргүүн Ши Жиньпин аврах ажиллагаанд бүх хүчин чармайлтаа дайчлахыг холбогдох албаныханд даалгажээ.

Хөрш Балбад газар хөдлөлтийн чичиргээ мэдрэгдсэн ч ноцтой том хохирол гараагүй байна.

2015 онд Балбын нийслэл Катмандугийн ойролцоо 7.8 магнитудын хүчтэй газар хөдлөхөд 9,000 орчим хүн амиа алдаж, 20,000 гаруй хүн бэртэж байжээ.

Эх сурвалж: BBC