Л.Оюун-Эрдэнэ: Ажил гацаадаг хүмүүс гараад ирвэл бид түгжирсээр л байна. Тиймээс тодорхой хэмжээний захиргаадалтын арга хэмжээ авна

Гэрэл зургийг MPA агентлагийн онцгой зөвшөөрөлтэйгөөр ашиглав

Ерөнхий сайд Л.Оюун-Эрдэнэ болон хотын дарга Х.Нямбаатар нар холбогдох албан тушаалтнуудын хамт Туулын хурдны замын трассын гүүрэн туннель огтлолцох цэгт өнөөдөр ажиллажээ.

Тус зам нь Налайхын дөрвөн эгнээ авто зам буюу Баянзүрх гүүрнээс эхэлж, Сонгинохайрхан дүүргийн нутагт орших баруун аймгууд руу салдаг аюулгүйн тойрог хүртэл нийт 32 км үргэлжилнэ.

Энэ үеэр Ерөнхий сайд Л.Оюун-Эрдэнэ Туулын хурдны замын бүтээн байгуулалтын ажлыг дуусгахад Засгийн газар ямар бодлого барих талаар мэдээлэл өглөө.

Тэрбээр "Засгийн газар 2025 оныг нийслэлийн дэд бүтцийг дэмжих жил болгосон. Өмнө нь цар тахал, авлигад илүү төвлөрч байсан. Энэ жилийн хувьд бүсчилсэн хөгжлийн үзэл баримтлалд тулгуурлаад нийслэл Улаанбаатар хотын тулгамдсан асуудалд 365 хоног төвлөрч ажиллахаар шийдсэн.

Нийгмийн анхаарлыг ямар асуудлууд дээр төвлөрүүлэх, ямар асуудал байгаа, ямар хурдаар энэ ажлын үндсэн шийдлийг гаргах вэ гэдэг нь чухал. 

Тиймээс цар тахлын үе шиг штабын зохион байгуулалттайгаар ажиллана. Штабыг миний бие ахлах бөгөөд Баянзүрхийн товчооноос Сонсголон хүртэлх гэрлэн дохио, уулзваргүй Туулын хурдны замын асуудлыг шийдвэрлэхээр болсон. Үүнийг аж ахуйн нэгжүүдийн нэг хувийн татвар болон төрийн өмчит компаниудын хөрөнгө оруулалтаар шийднэ. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Хэвтээ тэнхлэгийн зургаан эгнээ замын бүтээн байгуулалтын ажлыг дөрөвдүгээр сараас эхлүүлнэ. Нийслэл 24 сарын дотор замын бүтээн байгуулалтын ажлыг дуусгана гэсэн. Бид үүнээс бага хугацаанд хийхийг шахаж байгаа. 

Газар чөлөөлөлт, хөрөнгө оруулалтын ажил хийгдэх учраас нийслэлчүүд, төр захиргааны байгууллагууд хамтран ажиллах ёстой. 

Аливаа ажлыг гацаадаг хүмүүс гарч ирээд гацаачихвал бид түгжирсэн хэвээрээ л байна. Тиймээс тодорхой хэмжээний захиргаадалтын арга хэмжээ авна, хууль эрх зүйн орчин бүрдүүлнэ. 

Босоо тэнхлэгийн зам зуслангийн бүсээс Туулын хурдны зам хүрнэ. Богд уулыг туннелиэр нэвтэлж нисэх онгоцны буудалтай холбох, эсвэл тойрсон хурдны зам барихын аль нэгийг сонгоно" гэв.

 

Гэрэл зургийг MPA агентлагийн онцгой зөвшөөрөлтэйгөөр ашиглав