Jeju Air компанийн онгоц буусан зурвасын төгсгөлд бетонон хашаа байсан нь мэргэжилтнүүдийг гайхшируулж байна

Ням гарагт Өмнөд Солонгосын Муан хотын нисэх буудалд газардсан Jeju Air компанийн нисэх онгоц бетонон хашаа мөргөсний улмаас 179 хүний амь хохирсон билээ.

Онгоц буух, хөөрөх зурвасын төгсгөлөөс 250 метрийн зайд байрласан бетонон хашаа нисэхийн мэргэжилтнүүдийн анхаарлыг татаж байна.

Хэрвээ энэ хашаа байгаагүй бол онгоц эх биеэрээ гулсан аажмаар зогсож, зорчигчид амьд гарах боломжтой байсан гэж нисэхийн аюулгүй байдлын шинжээч Дэвид Лирмонт тайлбарлажээ.

Онгоц шувуутай мөргөлдөж гэмтсэний дараа нисгэгч яаралтай буух шаардлагатай болсон тул зурвасын эсрэг талаас буух хүсэлтийг нислэгийг удирдах төвд тавьсан юм байна.

“Дугуй дэлгэгдээгүй буулт амжилттай болсон. Далавчнууд нь тэгш хэмтэй, хамар нь сүүлээ хугалахааргүй өндөртэй байрлалд байсан байна. Олон хүн амиа алдсан гол шалтгаан нь газардалтаас болоогүй, харин зурвасын төгсгөлд маш хатуу саадтай мөргөлдсөнөөс болжээ” гэж Лирмонт тайлбарлажээ.

Өмнөд Солонгосын Ёнхап агентлагийн мэдээлснээр уг бетон байгууламж нь онгоц буухад туслах зориулалттай “localiser” гэгддэг навигацийн системийн хамгаалалт байжээ.

Ийм бетон байгууламж тус улсын орон нутгийн болон гадаадын зарим нисэх буудлуудад байдаг тухай Өмнөд Солонгосын зам тээврийн яам мэдээлсэн байна.

Гэхдээ үүнийг илүү хөнгөн хэврэг материалаар хийх ёстой байсан эсэхийг шалгах шаардлагатайг албаныхан мэдээлжээ.

Сая осолдсонтой ижил загварын онгоцоор нисдэг, 48 жилийн туршлагатай нисгэгч Крис Кингсвүүд BBC агентлагт ярихдаа “Хөөрөх, буух зурвасаас тодорхой зайд байгаа саадууд хэврэг материалтай байх ёстой. Өөрөөр хэлбэл онгоц мөргөхөд амархан эвдэрдэг байх шаардлагатай юм” гэсэн байна.

“Ийм бат бөх материалтай хашаа байсан нь хачирхалтай санагдаж байна. Миний ойлгосноор онгоц маш хурдтай бууж, удаан гулссан тул зурвасын төгсгөлөөс нэлээд хол хэтэрч зогсох байсан. Онгоц бол бат бөх бүтэцтэй техник биш. Нисэхэд хөнгөн байхаар бүтээгдсэн. Онгоц эх бие дээрээ өндөр хурдтай гулсах зориулалттай бүтээгдээгүй тул замд нь таарсан ямар ч төрлийн бүтэц шатахууны савыг нь эвдэж, гал гарах боломжтой. Тиймээс зурвасын төгсгөлд ийм хашаа байгаагүй бол нөхцөл байдал тэс өөр байх байсан гэж бодож байна” гэж Кингсвүүд ярьжээ.

Нисгэгч зурвасын эсрэг талаас (урсгал сөрж) буух зөвшөөрөл хүсэхдээ төгсгөлд нь бетонон хашаа байгааг мэдэж байсан эсэх нь анхаарал татаж байгааг нислэгийн аюулгүй байдлын шинжээч Сэлли Гетин хэлж байна.

“Зурвасын төгсгөлд ийм хашаа байгааг нисгэгчид мэдэж байсан уу? Нислэгийг удирдах төв тэдэнд ингэхийг зөвшөөрөлгүй зурвасын зөв талаас нь буух заавар өгсөн үү? Энэ бүхний хариу онгоцны хар хайрцгийн бичлэгээс ил болох байх” гэж тэр ярьжээ.

Эх сурвалж: BBC