Оросын мөрдөгчид Москвад генералын амийг хөнөөсөн хэргийн сэжигтнийг баривчилжээ

Мягмар гарагийн өглөө Москва хотод Оросын цөмийн зэвсэгт хүчний генерал Игорь Кириллов скүүтерт нуусан бөмбөгийн дэлбэрэлтэд амь үрэгдсэн билээ.

Тэгвэл Оросын хууль хүчнийхэн уг аллагыг Украины тусгай албадын (СБУ) заавраар гүйцэтгэсэн байж болзошгүй Узбекистаны иргэнийг өчигдөр баривчилжээ.

Сэжигтэн Украины тусгай албадын өгсөн даалгаврыг биелүүлэхээр Москвад ирснээ хүлээснийг Оросын Мөрдөн Байцаах Хороо мэдээлсэн байна.

Улмаар Оросын хуулийн байгууллагуудад эх сурвалжтай гэгддэг База мэдээллийн суваг сэжигтэн автомашин дотор мэдүүлэг өгч байгааг харуулсан дүрс бичлэгийг цацжээ.

Энэ үеэр тэр Украины тусгай албадын захиалгаар Москвад ирж, цахилгаан скүүтер худалдаж аваад тэсрэх бөмбөг суурилуулснаа ярьж байв.

Бас уг скүүтерээ Кирилловын амьдардаг орон сууцны орцны үүдэнд байрлуулснаа хүлээжээ.

Сэжигтний түрээсэлж авсан автомашиндаа суулгасан камераар Украины Днипро хотоос аллагын захиалагчид нөхцөл байдлыг ажиглаж, удирдаж байсан тухай Оросын мөрдөн байцаах албаны эх сурвалж тайлбарласан байна.

1995 онд төрсөн сэжигтэн энэ ажиллагааных нь төлөө Украины тал түүнд $100,000 болон Европын улсад оршин суух эрх амласан гэж мэдүүлжээ.

Аллагатай холбоотой өөр хүмүүсийг бас шалгаж байгаагаа Оросын мөрдөн байцаагчид мэдээлсэн байна.

ОХУ-ын гадаад хэргийн яамны хэвлэлийн төлөөлөгч Мария Захарова уг аллагын асуудлыг энэ сарын 20-ны өдөр НҮБ-ын аюулгүй байдлын зөвлөлд оруулахаар төлөвлөж байгааг өчигдөр сэтгүүлчдэд дуулгажээ.

“Шинэ террорист халдлагын хариуцлагыг Киевийн дэглэм дахин хүлээснийг бид харж байна. Эдгээр СБУ-ын азгүйчүүд, Киевийн галзуу дэглэм бүгд Англо-Саксончуудын утсан хүүхэлдэйнүүд юм. Тэд бол Киевийн терроризмын гол ашгийг хүртэгсэд юм” гэж тэр мэдэгдсэн байна.

Англо-Саксон гэдэг нь Оросын суртал нэвтрүүлэгчдийн АНУ болон Их Британийн удирдагчдыг тодорхойлдог нэр томьёо юм.

АНУ-ын төрийн департамент энэхүү аллагад холбоогүй, урьдчилж мэдээгүй байснаа Мягмар гарагт зарлаж байв.

Их Британийн ерөнхий сайд Кир Стармерын хэвлэлийн төлөөлөгч алагдсан генерал Кирилловыг “Украины ард түмэнд зовлон зүдүүр, үхэл хагацал учруулагч, Оросын хууль бус эзлэн түрэмгийллийг сурталчлагч” байсан гэж мэдэгдсэн юм.

Одоогоор ОХУ-ын ерөнхийлөгч Владимир Путин энэхүү аллагын талаар байр суурь илэрхийлээгүй байна.

Түүний хэвлэлийн төлөөлөгч Дмитрий Песков өчигдөр сэтгүүлчидтэй уулзахдаа Украиныг “терроризмын арга хэрэглэсэн” хэмээн буруушааж, уг хэргийг түргэн шуурхай мөрдөн шалгаж буй Оросын тагнуулын албадын ажлыг өндрөөр үнэлж байгаагаа илэрхийлжээ.

Эх сурвалж: Reuters