Д.Бум-Очир гишүүн УИХ-ын даргад "загнуулснаар" Кино урлагийг дэмжих сантай холбоотой саналаа татав

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын чуулганы хуралдаанаар 2025 оны төсвийн тухай хуулийн хоёр дахь хэлэлцүүлгийг хийж байна. Энэ үеэр байнгын хорооны хуралдаанаар гишүүдийн гаргасан зарчмын зөрүүтэй асуудлаар санал хураалт явуулав. 

УИХ-ын гишүүн Ч.Ундрам Боловсролын зээлийн сангийн 2024 оны зарцуулаагүй үлдэгдлийг 2025 оны төсвийн эх үүсвэрт зарцуулах тухай саналыг гаргажээ. Уг саналтай холбогдуулан Сангийн сайд Б.Жавхлан хууль тайлбарлав. 

Сангийн сайд Б.Жавхлан "2024 оны төсвийг 2025 оныхтой холино гэдэг чинь хууль зөрчсөн замбараагүй зүйл. Хэрэгжих боломжгүй" гэв.

Санал гаргасан УИХ-ын гишүүн Ч.Ундрам "Боловсролын салбарын төсөв харьцангуй нэмэгдсэн ч хориг тавиулсан төсвөөс 159 тэрбум төгрөгөөр танагдсан. Үүний нэг нь Боловсролын зээлийн сан. Тус сангийн санхүүжилт 15.5 тэрбум төгрөгөөр хасагдсан. Одоо энэ санд 11 тэрбум төгрөгийн үлдэгдэл байгаа. Тиймээс үлдэгдлийг нь он дамнуулаад зарцуулъя гэдэг санал гаргасан. Гэхдээ маш их авлагатай учраас авлагаараа санхүүжээд явах боломжтой юм байна. Тиймээс саналаа татъя" гэснээр уг санал татагдав. 

Дараагийн зарчмын зөрүүтэй санал нь өмнөхтэй яг ижил буюу Кино урлагийг дэмжих сангийн 2024 онд зарцуулаагүй үлдэгдлийг 2025 онд зарцуулна гэдэг санал байв. Уг саналыг УИХ-ын гишүүн Д.Бум-Очир гаргажээ.

УИХ-ын гишүүн Д.Бум-Очир "Бид эдийн засгаа солонгоруулъя гэж яриад байгаа" гэхчлэн гаргасан саналаа тайлбарлаж эхэлтэл УИХ-ын дарга Д.Амарбаясгалан “Д.Бум-Очир гишүүн ээ, бидэнд одоо элдэв поп сэдэв хэрэггүй. Төсвийн хуультай нийцэж байна уу үгүй юу гэдгээ ярих нь чухал байна. Сая Сангийн сайд маш тодорхой тайлбар өглөө. 2024 оны үлдэгдэл төсвийг 2025 онд ашиглах боломжгүй, хууль зөрчинө. Хууль зөрчсөн санал гаргасан гишүүн энэ асуудлаа санал хураалтаар шийдүүлэх үү эсвэл саналаа татах уу гэдгийг тодруулах гэж л өөрт чинь микрофон өгч байгаа юм" хэмээн ширүүхэн анхааруулснаар Д.Бум-Очир гишүүн саналаа татаж буйгаа илэрхийллээ.