Т.Доржханд: Шилжилт болгон өвдөлттэй байдаг нь үнэн

Гэрэл зургийг MPA агентлагийн онцгой зөвшөөрөлтэйгөөр ашиглав

Эрчим хүчний реформын үндэсний хорооноос Төрийн ордонд өнөөдөр хэвлэлийн хурал зарлалаа. 

Ачааллыг бууруулж эрчим хүчний шилжилтийг эхлүүлэх нь чухал байгаа. Шилжилт болгон өвдөлттэй байдаг нь үнэн. Гэхдээ иргэдэд аль болох ачаалал өгөхгүйгээр эрчим хүчний шилжилтийг хийж байгааг Шадар сайд Т.Доржханд хэлсэн юм. 

Эрчим хүчний реформын талаар тэрбээр үргэлжлүүлэн дараах мэдээллийг өгсөн юм. 

Энэ талаар хэлэхдээ "Монгол улсын хамтарсан Засгийн газар байгуулагдсаны гол зорилго нь 34 жилийн хугацаанд шийдэж чадахгүй томоохон асуудлуудаа шийдэхэд оршино. 

Эдийн засгийн реформын хамгийн чухал суурь нь эрчим хүчний шилжилт юм. Эрчим хүч байхгүй бол эдийн засаг байхгүй.

Хатуу байр суурьтайгаар бид реформоо үргэлжлүүлж байна. Үүнтэй холбоотойгоор иргэдэд маш их эргэлзээ үүссэн. Эрчим хүчээ дотоодоос өөрсдөө хангаж чадах уу гэх асуулт. 

Баяртай мэдээ дуулгахад Монгол улсын эрчим хүчний экспортын ажил эхлээд явж байна.

Монгол улсын ерөнхий сайдын Саудын Араб, Эмират улсад хийсэн айлчлал маш амжилттай болсон. Энэ хүрээнд маш том хэмжээний ногоон эрчим хүчний салбарт хөрөнгө оруулалт хийх саналыг томоохон тоглогчидтой ярилцжээ. 

Бид өөрсдийгөө эрчим хүчээр хангадаг улс биш цааш эрчим хүчийг экспортолно гэдэг зорилт бодитойгоор ажил хэрэг болоод явна. Үүнтэй холбоотойгоор худалдаж, худалдан авах чиглэлд дөрвөн долоо хоногийн өмнө БНХАУ-ын Засгийн газартай маш сайн яриа хэлэлцээр хийсэн.

Хөрөнгө оруулагчид Монголыг сонирхож байна. Яагаад гэвэл танай зээлжих зэрэглэл өссөн, эдийн засаг, улс төрийн орчин чинь тогтвортой болсон байна. Иймд хөрөнгө оруулалт хийж болно. Гагцхүү олон улсын стандартын дагуу хамтын ажиллагаагаа явуулъя гэсэн байр суурийг илэрхийллээ" гэв. 

Үргэлжлүүлэн тэрбээр "Өнөөдөр 150,000 айл өрхийг яндангүй болгож, орон сууцжуулах хөтөлбөр яригдаж буй. Мөн адил эрчим хүч, дулааны асуудал ч байна. 

Монголчууд олон жил эрчим хүчний хувьд хараат байсан.

Бодит нөхцөл байдлыг хэлэхэд өнөөдөр бидэнд

• эрчим хүчний эх үүсвэр байхгүй.
• Дулаан ч байхгүй.
• Төсөв дээр мөнгө байхгүй.
• Хөрөнгө оруулалт хийе гэхээр нүүрсэнд хөрөнгө оруулалт байхгүй.
• Сэргээгдэх рүү хөрөнгө оруулалт хийе гэхээр үнэтэй гээд хаасан.

Ийм байдлаар улс хөгжихгүй байгаа нь үнэн. Бид шилжилтийг амжилттай хийнэ гэсэн итгэл үнэмшилтэй байна. Шилжилт болгон өвдөлттэй байдаг нь үнэн. Гэхдээ иргэдэд аль болох ачаалал өгөхгүйгээр эрчим хүчний шилжилтийг хийж байгаа.

Аливаа зүйлийг монголчилдог цагийг зогсоох ёстой. Олон улсын стандартаар ажлаа төлөвлөж, олон улсын томоохон хөрөнгө оруулагчидтай хамтарч байж шилжилт бодитой хийгдэнэ" гэж хэлэв.