• 11 сарын 22, Баасан
|
Уншиж байна ...

Т.Доржханд: Эрчим хүчний үнэ тарифыг өөрчилж богино хугацааны стратеги эхлүүлнэ

П.Сайнжаргал, IKON.MN
2024 оны 10 сарын 30
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын ээлжит хуралдаанаас гаргасан шийдвэрийг танилцуулж байна.

Энэ үеэр эрчим хүчний салбарын реформын талаар Шадар сайд Т.Доржханд дараах мэдээллийг танилцуулав. 

Тэрбээр хэлэхдээ "Нүүрснээс эрчим хүч гаргадаг цахилгаан станцын санхүүжилтэд хүндрэл тулгарсан.

Сүүлийн 20-30 жилийн үл ойлголцол, талцал хуваагдал, хийрхлээс үүдэн томоохон төслүүдээ хэрэгжүүлж чадаагүй нь бодит үнэн. Үүндээ дүгнэлт хийж, одоо бүгд хамтдаа томоохон төслүүдээ хэрэгжүүлье.

Монголдоо сайхан амьдрах залуусын боломжийг эдийн засгийн өсөлтөөр л бий болгоно. Эдийн засгийн өсөлтөө тэлэхэд хамгийн ихээр хязгаарлаж байгаа нь эрчим хүчний салбар.

Засгийн газрын зүгээс 14 мега төслийг танилцуулсан. Эхнээсээ хэрэгжүүлж байгаа бөгөөд заримынх нь эх үүсвэр шийдэгдсэн. Гэтэл эдгээр төслийг санхүүжүүлж явахад хамгийн их дутагдалтай зүйл бол эрчим хүч. 14 мега төслийн найм нь гэхэд л 600-гаад МГв эрчим хүчний эх үүсвэр хэрэгтэй байгаа.

Цаашид 150,000 өрхийг орон сууцжуулах хөтөлбөрийг зоригтой зарлаж байна. Томоохон төслүүдээ хэрэгжүүлж чадаагүй нь бодит үнэн. Тэгвэл дүгнэлт хийж, одоо хамтдаа төслүүдээ хэрэгжүүлье. Үр дүнг нь иргэдэд нээлттэй өгье. Бодит орлогыг өсгөе" гэлээ. 

Үргэлжлүүлэн "Төрийн монополи болчихсон эрчим хүчний салбарыг хувийн сектор луу шилжүүлэх, төвлөрсөн системийг тархмал эх үүсвэр буюу задлах тогтолцоог мөн хэлж байгаа.

Эрчим хүчний технологийн шинэчлэл хийх алхмууд нийлж, цогц агуулгаараа эрчим хүчний реформ болж байгаа.

Урт хугацаандаа бид эрчим хүчний экспортлогч орон байх юм байна. Монгол Улс бол энергийн эх орон юм байна. Тэгвэл энэ өгөгдөл дээрээ уул уурхайн салбараас дан ганц хараат байдаг улсынхаа эдийн засгийн хоёр дахь том салбарыг эрчим хүчний салбар болгох нь зүйтэй. 

Ур хугацааны стратеги: Эрчим хүч экспортолж орлого олох боломжийг бий болгох.

Дунд хугацааны стратеги: 2024-2028 оны хугацаанд Монгол Улс бие даасан хараат бус, тусгаар эрчим хүчний системтэй болно гэдэг зорилт тавьсан.

Нийт эрчим хүчний хэрэглээнийхээ 22-23 хувийг хоёр хөршөөсөө өндөр үнээр импортолдог.

Жил ирэх тусам эрчим хүчний хэрэглээ дунджаар 10 хувиар өсөж байгаа. Шинээр байшин баръя гэхэд цахилгаан дулааныхаа холбоосыг хийж чадахгүй нөхцөлд бий.

Үйлдвэр баръя гэхэд эрчим хүчний эх үүсвэр байхгүй. ЖДҮ, боловсруулах үйлдвэр, уул уурхай, дэд бүтцийн бүтээн байгуулалт, маш энгийнээр метро баръя гэхэд л эрчим хүч байхгүй байгаа.

Монгол Улс эрчим хүчнийхээ хүчийг 100 хувь өөрсдөө үйлдвэрлэдэг, хараат бус, бие даасан болно. Харин шаардлагатай үед хоёр хөршөөсөө импортолж, экспортолдог нөхцөл рүү орох зорилт тавьж байгаа.

Богино хугацаанд: Үнэ тарифын өөрчлөлт хийхээс эхлэх юм байна. Энэ шилжилтийг өнөөдөр зайлшгүй эхлүүлэх ёстой. Гэхдээ энэ шилжилт иргэд, бизнес эрхлэгчдэд аль болох дарамтгүйгээр олон улсын туршлага дээр үндэслээд шинэчлэл хийх нь зүйтэй гэх байдлаар шийдвэр гарч буй.
Өнөөдрийн шилжилт дан ганц үнэ тарифын шилжилт биш юм. Эрчим хүчний салбарт үүсээд буй байгалийн монополи нь төрийн монополи болсон асуудлыг цэгцэлнэ. Авлига, хээл хахууль, үр ашиггүй байдлыг цэгцэлнэ.

Засгийн газрын түвшинд шийдвэрээ гаргасан. УИХ-ын бүлгүүдэд танилцуулж, тэдний зүгээс дэмжиж ажиллахаа илэрхийлсэн.

Өнөөдрийн байдлаар УИХ-ын 100 гаруй гишүүн үүнийг дэмжихээ илэрхийлээд байгаа. Нам үл харгалзан улс орныхоо эрх ашигт хамтдаа байдаг байя гэх шийдвэрийг нэгдсэн байдлаар гаргаж буй.

Өнөөдөр Үндэсний аюулгүй байдлын зөвлөл хуралдана. Хурлын үеэр эрчим хүчний хараат бус байдлынхаа асуудлыг танилцуулах юм" хэмээн Шадар сайд Т.Доржханд хэллээ. 

ВИДЕО: 

https://www.facebook.com/iKonNews/videos/1991103604667896