Гэрэл зургийг MPA агентлагийн онцгой зөвшөөрөлтэйгөөр ашиглав

Өнөөдөр 10:00 цагт эхэлсэн УИХ дахь МАН-ын намын бүлгийн ээлжит хурал одоог хүртэл үргэлжилж байна. Хурлаар гурван асуудал хэлэлцэх товтой байсан ч яг одоо хэлэлцүүлгийн шатанд буй 2025 оны төсөвтэй холбоотой маргаан ийнхүү сунжирч хуралдахад хүргэсэн бололтой. 

Тодруулбал, тойргоос, тэр дундаа хоёроос доошгүй сонгогдсон гишүүд тойрогтоо 5 тэрбум төгрөг суулгах санал гаргаснаар төсвийн хэлэлцүүлгийг гацаах хэмжээнд хүрч болзошгүй нөхцөл үүсээд байгаа гэх агуулгатай мэдээлэл нэр бүхий сайтад нийтлэгдсэн. 

Тэгвэл уг мэдээллийг баталсан хариултыг МАН-ын зарим гишүүн өгчээ. Тухайлбал ubn.mn сайтын сэтгүүлчийн асуултад УИХ-ын гишүүн Э.Болормаа дараах хариултыг өгсөн байна.

Тэрбээр "Төсвийн ажлын хэсэг дээр ийм санал гарсан юм билээ. Энэ саналыг өнөөдөр бүлгийн хурлаар хэлэлцлээ. Ганц манай нам биш нам дамнасан бүлэглэл ийм санал гаргасан. Хаана зам, эмнэлэг шинээр барихыг тухайн тойргийн гишүүн бус салбарын яамд нь шийддэг байх ёстой. Бүлэг дээр энэ асуудлыг хэлэлцээд тойргийн төсөв гэдэг зүйлийг дэмжихгүй гэдэг дээр санал нэгдсэн" гэдэг мэдээлэл өгсөн. 

Мөн УИХ-ын гишүүн О.Номинчимэг "Зөвхөн манай нам гэлтгүй Ц.Даваасүрэн гишүүнээр ахлуулсан Төсвийн ажлын хэсгээс ийм санал орж ирсэн. Энэ ажлын хэсэгт бүх намын төлөөлөл багтсан. Гэхдээ энд МАН-аас жагсаалтаар сонгогдсон нэг ч гишүүн байхгүй. Бүгд тойргоос сонгогдсон гишүүн. Төсөв бол хөгжлийн бодлого байх ёстой. Санал хураалт явуулахад Засгийн газраас өргөн барьсан төсвийн бодлого буюу хамгийн гол зүйлүүдэд чиглэсэн хөрөнгө оруулалтаа хийе, аймаг, суманд жижиг үр дүнгүй ажил хийхгүй гэдэг байр сууриа хадгалсан" гэлээ. 

Дээрх гишүүдийн хэлснээр Засгийн газраас өргөн мэдүүлсэн 2025 оны төсвийн тухай хуулийн байнгын хороо, нэгдсэн чуулганы хуралдаанаар хэлэлцүүлэх үүрэг бүхий ажлын хэсгээс тойргийн төсөв болгож 5 тэрбум төгрөг суулгах саналыг гаргажээ. Тэгвэл уг ажлын хэсгийн ахлагч, Төсвийн байнгын хорооны дарга Ц.Даваасүрэн дараах байр суурийг илэрхийлсэн байна. 

Төсвийн ажлын хэсгийн ахлагч Ц.Даваасүрэн "Жагсаалтаар болон тойргоос сонгогдсон гишүүдэд ялгаа байна л даа. Тойргоос сонгогдсон гишүүдэд иргэд хүсэлт тавьдаг. Тэрийг нь тухайн тойргоос сонгогдсон гишүүн шийдэх гэж үзнэ. Жагсаалтаар сонгогдсон гишүүнд тийм асуудал байхгүй. Тойргоос сонгогдсон гишүүдийн ярьж байгаа асуудал бол иргэдийн асуудал шүү дээ. Үүнийг жалганы асуудал гээд хаяад байж болохгүй. Бидний гаргасан саналд гишүүн бүрд 5 тэрбумын төсөв өгнө гээгүй. Харин бүс, тойрогт шаардлагатай асуудлыг шийдэх төсвийн тухай ярьж байгаа. Зөвхөн ажлын хэсгийнхэн гэлтгүй тойргоос сонгогдсон гишүүдийн дийлэнх ийм санал гаргасан" гэсэн байна. 

Ц.Даваасүрэн гишүүний хэлснээр тойргоос сонгогдсон 78 гишүүний олонх нь тойрогтоо төсөв суулгах саналтай байгаа аж. Гэхдээ МАН-ын бүлгийн хурлаас энэхүү саналыг дэмжээгүй. Гэсэн ч ажлын хэсэгт багтсан АН-ын гишүүд асуудлаа бүлгээрээ хэлэлцүүлж шийднэ гэх салаа утгатай хариулт өгөв. 

Дээрх гишүүдийн ярианаас төсвийн ажлын хэсэгт багтсан, тойргоос сонгогдсон гишүүд тойргийн төсөв гэх 5 тэрбум төгрөгийн асуудлыг гаргаж ирсэн гэцгээж байна. Тэгвэл уг ажлын хэсэгт багтсан гишүүдийг тойргоос сонгогдсон болон намын харьяаллаар танилцуулъя. 

Тойрог бүрд 5 тэрбум төгрөгийн төсөв суулгах санал гаргасан ажлын хэсгийн гишүүдийг танилцуулж байна. 

 

 

Тус ажлын хэсэгт багтсан, тойргоос сонгогдсон МАН-ын гишүүд:

• Ц.Даваасүрэн,
• Х.Булгантуяа,
• Г.Тэмүүлэн, 
• М.Бадамсүрэн, 
• Ж.Батжаргал, 
• Н.Батсүмбэрэл, 
• Б.Бат-Эрдэнэ, 
• Ж.Ганбаатар, 
• Г.Дамдинням, 
• Х.Жангабыл, 
• Б.Заяабал, 
• З.Мэндсайхан, 
• Д.Үүрийнтуяа

Тойргоос сонгогдсон АН-ын гишүүд: 

• Х.Болормаа, 
• Ш.Бямбасүрэн, 
• Ц.Мөнхбат, 
• Л.Мөнхбаясгалан,
• Б.Түвшин,
•  С.Эрдэнэболд