А.Бүрэнбаатар: Бүсчилсэн хөгжлийн асуудал шадар сайд С.Амарсайханд шилжиж ирсэн
Бүсчилсэн хөгжлийн үндэсний чуулган энэ сарын 26-нд зохион байгуулагдах тухай Бүсчилсэн хөгжлийн үндэсний хүрээлэнгээс өнөөдөр Туушин зочид буудалд хэвлэлийн хурал зохион байгууллаа.
Энэ үеэр шадар сайд С.Амарсайханы зөвлөх А.Бүрэнбаатар "УИХ-ын сонгууль бүсчилсэн тойргоор зохион байгуулагдан 126 гишүүн сонгогдож, Засгийн газар үйл ажиллагаандаа орсон. Засгийн газрын 2024-2028 оны үйл ажиллагааны тэргүүлэх чиглэлд бүсчилсэн хөгжлийн бодлого багтаж байгаа.
Тиймээс шадар сайд С.Амарсайханы эрхлэх ажлын хүрээнд бүсчилсэн хөгжлийн асуудал шилжиж ирсэн. Өмнө нь Эдийн Засаг, Хөгжлийн Яаманд харьяалагддаг байв.
Бүсчилсэн хөгжлийн үндэсний хүрээлэн гэх байгууллага байгуулагдаж, шадар сайдын өгсөн чиглэлийн дагуу энэ удаагийн чуулганыг зохион байгуулах болсон. Мөн тус чуулган нэг өдрийн хугацаанд UG Arena-д болох бөгөөд долоон бүс нэг цагийн хугацаанд хэлэлцүүлгээ хийнэ" гэх мэдээллийг өгөв.
"Иргэд, аж ахуйн нэгж, малчид, хоршоодын гарт буй түүхий эд, бүтээгдэхүүнийг боловсруулж гадаадын зах зээлд хүргэх стратегийн 90 төвтэй байна"
Үргэлжлүүлэн Бүсчилсэн хөгжлийн үндэсний хүрээлэнгийн гүйцэтгэх захирал, доктор Д.Эрдэнэбаяр "Монгол Улс хоёр дахь удаагаа бүсчилсэн хөгжлийн үзэл баримтлалыг УИХ-аар батлуулсан. Бүсчилсэн хөгжлийн үзэл баримтлалыг 23 жилийн дараа цоо шинэ хөгжлийн загвар, орчин нөхцөл, онолын чиг хандлагаар баталж байна.
Бүсчилсэн хөгжлийн үндэсний чуулганд шинээр сонгогдсон УИХ-ын гишүүд, орон нутгийн шинэ удирдлага, худалдаа хөгжлийн танхим, шилжин суурьшигчид, мэргэжлийн холбоод оролцож томоохон бодлого батална. Үүний дараа нээлттэй санал солилцох, бодлогоо сурталчлан таниулах, гадаад дотоодын хөрөнгө оруулалтыг бүсүүдэд хэрхэн зохион байгуулах вэ гэх анхны санал солилцох уулзалтыг энэ сарын 26-нд зохион байгуулна.
Мөн бүсчилсэн хөгжлийн бодлого нь хувийн хөгжлийн дэмжсэн чиглэлд батлагдсан. Тухайлбал 330 сумын дунд стратегийн 90 төв байна. Иргэд, аж ахуйн нэгж, малчид, хоршоодын гарт буй түүхий эд, бүтээгдэхүүнийг боловсруулж гадаадын зах зээлд хүргэх стратегийн 90 төвийг баталж, улсын төсвийн хөрөнгө оруулалтыг чиглүүлнэ.
Үүний дагуу хүн амын нутагшил суурьшлын схем, ерөнхий төлөвлөлт, хотуудын эдийн засгийн чиг үүргийг хэрэгжүүлэхээр төлөвлөсөн. Энэ хүрээнд бүсүүдийн эдийн засгийн чуулганыг зохион байгуулж, хөдөө орон нутагт ажиллаж амьдарч буй иргэд, хоршоод, эрдэмтэн судлаач нарын саналыг сонсох анхны хэлэлцүүлгийг хийнэ.
21 аймгаас орон нутгийн хөгжлийн бодлого, төлөвлөлтийн хэлтсийн хамт олныг бүрэн бүрэлдэхүүнээр нь урьж оролцуулж байгаа.Орон нутгийн сонгуулийн дараа ирэх дөрвөн жилд ямар бодлого төлөвлөж байгаа талаар олон нийтэд нээлттэй танилцуулж, санал авна.
Тиймээс орон нутагт хөрөнгө оруулалт хийх, шилжин суурьших, томоохон төсөл хөтөлбөрийн саналыг дэвшүүлж буй иргэд, аж ахуйн нэгжийг энэхүү чуулганд нээлттэй оролцох боломжийг гаргаж өгч байна. Түүнчлэн энэхүү чуулганыг Улаанбаатарт зохион байгуулсны дараа энэ онд багтаж бүс бүр дээр хэлэлцүүлэг явуулна" хэмээн ярилаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
