Д.Алтанцэцэг: Газрын тос боловсруулах үйлдвэр байгуулах төсөл тасалдаагүй. $251 саяын санхүүжилтийг зарцуулаад байна

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ дахь МАН-ын бүлэг хуралдаж, Дорноговь аймагт баригдаж буй газрын тос боловсруулах үйлдвэрийн ажлын явцтай холбоотой асуудлыг хэлэлцсэн байна. 

"Тус үйлдвэрийг барихад 1.2 тэрбум ам.долларын санхүүжилт хүрэлцэхгүй байх нөхцөл үүссэн. Энэтхэгийн ЭКСИМ банкнаас 431 сая ам.долларын зээлийг нэмж авах гэрээг байгуулах, УИХ-аар соёрхон батлагдаж, тус төсөл зогсохгүй явах нөхцөл бүрдэнэ" хэмээн Аж Үйлдвэр, Эрдэс Баялгийн сайд Ц.Туваан мэдээлэл өглөө. 

Мөн МАН-ын бүлгийн зүгээс нэмэлт санхүүжилтийн асуудлыг нэн даруй шийдвэрлэх, Энэтхэгийн талтай ярилцаж, УИХ-аар соёрхон батлах бэлтгэл ажил хангах хэрэгтэй гэсэн улс төрийн шийдвэр гаргасан талаар УИХ-ын гишүүн Л.Мөнхбаатар мэдээлсэн.

Үргэлжлүүлэн “Монгол газрын тос боловсруулах үйлдвэр” ТӨХХК-ийн гүйцэтгэх захирал Д.Алтанцэцэг "Газрын тос боловсруулах үйлдвэр байгуулах төсөл тасалдсан, зогссон зүйл байхгүй. Эхэлсэн цагаас хойш тасралтгүй явж байна. 

Дорноговь аймгийн Алтанширээт сумын нутагт бид бүх зүйлийг шинээр хийж байгаа. Өнөө үед газрын тос боловсруулах үйлдвэрийг цоо шинээр барина гэж байхгүй. Ихэнх төсөл нь нефть химийн салбар руу тэлэх, хүчин чадлаа нэмдэг.

Дараагийн хүнд аж үйлдвэрийн төслийг хэрэгжүүлэхэд ихээхэн хугацаа орно. ТЭЗҮ боловсруулагдсан бол барьж эхлүүлдэг гэж ойлгоод байна. Газрын тос боловсруулах үйлдвэр нь 12 үндсэн технологийн байгууламжтай. Үүний инженерчлэлийн ажил таван үе шаттай, 2-4 жил үргэлжилнэ. 

Манай компани монголчуудын дундаас анх удаа нефть химийн аж үйлдвэрийн шинэ суурийг тавихаар ажиллаж байгаа хамт олон. Үйлдвэрийн төсөл огт тасраагүй. Итгэл алдрах зүйл байж болохгүй. 

Гаалийн түр горим, ажилчдын визийн асуудлыг Энэтхэгийн талаас тавьдаг. Гаалийн түр горим нь урт хугацаанд хэрэгжих төсөлд орж ирдэг тоног төхөөрөмжийг нэг жил болсны дараа авч ирсэн эх орон руу нь буцаан тээвэрлэдэг төвөгтэй тогтолцоотой. Үүнийг зээлийн шинэ хэлэлцээрийн үеэр нэмж оруулна. 

Өнөөдрийн байдлаар 251 сая ам.долларын санхүүжилтийг зарцуулаад байна. Энэтхэгийн ЭКСИМ банкнаас олгож буй зээлийн хэмжээ 1.2 тэрбум ам.доллар юм. Энэ мөнгө нь Монголын банк руу орж ирдэггүй. Гүйцэтгэгч нь Энэтхэгийн компани юм. Монголд нэг ч ам.доллар ирж ирдэггүй. 

Нийт үнийн дүнгийн 60 хувь нь тоног төхөөрөмжийн захиалга, таван хувь нь инженерчлэл, 35 хувь нь барилга угсралт хэмээн хувааж байгаа. Томоохон тоног төхөөрөмж үйлдвэрлэгдэж байгаа боловч ЭКСИМ банкнаас төлбөрийг гаргахгүй байна. Өөрөөр хэлбэл гүйцэтгэж буй компани урьдчилж төлсний дараа тоног төхөөрөмж үйлдвэрлэгддэг" гэх мэдээллийг өглөө.