НЭМГ: Хан-Уул дүүргийн эмнэлэг дээр үүссэн асуудлаар Ажлын хэсэг томилогдсон. Дүгнэлтээ энэ сарын 23-нд танилцуулна

Гэрэл зургийг MPA агентлагийн онцгой зөвшөөрөлтэйгөөр ашиглав

Хан-Уул дүүргийн Эрүүл Мэндийн Төвийн эмч, ажилтнууд удирдлагуудтайгаа ойлголцож чадахгүй байгаа асуудлаар хэвлэлд хандацгаасан.

Тодруулбал тус эмнэлгийн дарга А.Сувдаа нь эмч ажиллагчдынхаа нийгмийн даатгалын шимтгэлийг төлөөгүй, маск, бээлий зэрэг ажлын хэрэгслээр хангадаггүй зэрэг нөхцөл байдал үүссэн талаар дэлгэрэнгүй мэдээлсэн юм.

Тэд өнгөрсөн долоо хоногт Үйлдвэрчний эвлэлд "Ажиллах нөхцөл бололцоогоор хангаж өгөөч" гэсэн хүсэлт өгсөн аж. Үүний дараа удирдлагын зүгээс өрөө тасалгааг нь хурааж авахаар дарамталсан талаар ч эмч нар ярьж байв.

Түүнчлэн илүү цагийн мөнгө тооцож өгдөггүй, нарийн мэргэжлийн эмч дутагдалтай байгаа тухай болон нийгмийн даатгалын шимтгэл нь тасалдаж, цалин нь цагтаа орохгүй байгаагаас ихэнх нь найдваргүй зээлийн ангилалд орсон гэдгээ өчигдөр хэвлэлд өгсөн мэдээлэлдээ онцолсон юм.

Хан-Уул дүүргийн Эрүүл Мэндийн Төв нь гуравдугаар шатлалын эмнэлгийн тусламж үйлчилгээ үзүүлэх хүчин чадалтай гэгддэг ч сүүлийн нэг сард энгийн био химийн шинжилгээг хийх бололцоогүй болсноор иргэдийг хувийн лабораториор явуулах зэргээр аргацааж байна. Мөн үзлэг хийхэд наад захын бээлий, маскийн нөөцгүй болсон тул ажлаа хийхэд хүндрэлтэй байгааг ярьж байв.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Тэгвэл өнөөдрийн Улсын Их Хурал(УИХ)-ын чуулганаар гишүүн Л.Лодойсамбуу үүсээд байгаа асуудлын талаар салбарын сайд Т.Мөнхсайханаас тодруулахад "Тус эрүүл мэндийн төв дээр үүсээд байгаа асуудал нь төсвийн гэхээсээ илүүтэйгээр байгууллагын удирдлагын алдаанаас болсон юм билээ. Би сайдаар томилогдсон цагаасаа хойш Эрүүл Мэндийн Даатгалын Сан хүнд байдалд байгааг ярьж эхэлсэн.

Хэдийгээр хүнд нөхцөлд байгаа ч цалин мөнгөө тавьж чадахгүйдээ хүртэл хямраагүй. Тиймээс энэ бол удирдлагын багийн сахилга батаас хамаарсан асуудал. Дүүргийн Эрүүл Мэндийн Төвийн удирдлагыг НЭМГ-аас томилдог. Тиймээс шалгалт хийж, шаардлагатай арга хэмжээг авах тухай албан бичиг тус газарт хүргүүлсэн" гэв.