Теслагийн өвдсөн ажилчдын гэрт удирдлагууд нь очсон тухай мэдээллийн мөрөөр Илон Маск шалгана
Цахилгаан автомашин үйлдвэрлэгч Тесла компанийн Берлин дэх үйлдвэрийн ажилчид эрүүл мэндийн шалтгаанаар чөлөө авсан үед захирал, менежэрүүд гэрт нь очиж шалгасан ховор сонин тохиолдлын талаар Германы Handelsblatt сонин мэдээлжээ.
Ингэж гэрт нь урилгагүй ирсэн хүмүүсийг ажилчид хөөж, зарим нь цагдаа дуудахаар сүрдүүлж байсныг дээрх мэдээнд өгүүлсэн байна.
Энэ оны наймдугаар сард Теслагийн Берлин дэх үйлдвэрийн өвчний улмаас чөлөө авсан ажилчдын тоо нийт ажилчдын 17 хувьд хүрсэн нь Германы нийт автомашины салбарын өнгөрсөн оны дунджаас гурав дахин өндөр байсныг Handelsblatt бас мэдээлжээ.
Германы металлургийн ажилчдын үйлдвэрчний эвлэл IG Metall-ийн бүс нутгийн тэргүүн Дирк Шульц өвдсөн ажилчдын гэрт очиж шалгасан Теслагийн үйлдлийг “тэнэглэл” гэж шүүмжилсэн байна.
Тэр бас Теслагийн ажилчдын ажлын ачаалал маш өндөр байдгийг энэ үеэр шүүмжлэн ярьжээ.
Handelsblatt сонинд нийтлэгдсэн мэдээллийн мөрөөр шалгахаа Тесла компанийн үүсгэн байгуулагч, гүйцэтгэх захирал Илон Маск амласан байна.
“Солиотой сонсогдож байна. Үүнийг судлах болно” гэж тэр дээрх мэдээллийг хуваалцсан Х платформын хэрэглэгчид хариулжээ.
Энэ оны нэгдүгээр сард Маск бизнес төлөвлөгөөгөө хөрөнгө оруулагчдад танилцуулах үеэр Теслагийн ажилчдад ажлын ачаалал нэмэгдэхэд бэлтгэлтэй байхыг анхааруулж байсан юм.
“Бидэнд үйлдвэрийн шугам дээр амьдрах инженерүүд үнэхээр хэрэгтэй байна. Бид үйлдвэрийн байрандаа хонодог болох ёстой” гэж тэрбумтан энэ үеэр хэлж байжээ.
Эх сурвалж: Business Insider
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
