Д.Баатарсайхан: Сонгуулиар сайд, дарга нар солигдсоны дараа төрийн албанд бүтцийн өөрчлөлт хийдэг нь зовлонтой

Яам, агентлагуудад хийж буй хяналт шалгалтын явц, төрийн албаны ерөнхий шалгалтын зохион байгуулалт, төрийн албаны хүний нөөцийн талаарх мэдээллийг Төрийн албаны Зөвлөл өнөөдөр танилцууллаа. 

Төрийн албаны Зөвлөлийн гишүүн Д.Баатарсайхан хэлэхдээ "Төрийн албаны шалгалтын үр өгөөж сайн байгаа. Жилд дөрвөн удаа, нэг ээлжид 5,000 гаруй иргэн шалгалт өгч байгаа.

Мэргэжил, туршлага шаардахгүй бүртгэл хийж авдаг шалгалт. Дөнгөж сургуулиа төгссөн залуус гол төлөв нөөц бүрдүүлж байна.

Ажлын байранд туслах түшмэл, дэс түшмэлээс бусдад нь ажилласан жил заасан байгаа. Тиймээс дөнгөж сургуулиа төгссөн залуус доод шатны мэргэжилтнээр ажилд орохоос биш шууд дээд тушаалд томилогдох боломж хомс. 

Төрийн албан хаагчийг дан ганц шалгалтаар чадавхжуулдаггүй.

2017 оны хуулиар Удирдлагын академи буюу Засгийн газрын сургалтын байгууллагад

• Тэргүүн түшмэл
• Эрхэлсэн түшмэл
• Ахлах түшмэлийг мэргэшүүлэх багц сургалтад гурван сарын хугацаатай хамруулж байгаа.

Туслах, дэс түшмэлийг мэргэшүүлэх дунд хугацааны сургалтад хамруулж байна. Мөн төрийн албан хаагчдыг ажлыг байранд сургах сургалтаар чадавхжуулж байгаа. Төрийн албан хаагчид харьцангуй чадавхжиж байгаа гэсэн үг" хэмээв. 

Үргэлжлүүлэн "Өнгөрсөн оны долдугаар сарын 1-нд цалин хөлсний тогтолцоог нэг ижил түвшинд аваачсан. Төрийн албанд хамгийн доод албан тушаал хашиж байгаа албан хаагчдын цалин ижил түвшинд очсон байгаа. 

Цалингийн систем харилцан адилгүй байвал хүн л болсон хойно барьцах асуудал гарна.  Жишээлбэл ТЗ5 ангилал дотроо 1-5 шатлалтай байсан. Шинэчлэлийн бодлогын хүрээнд үүнийг зогсоогоод нэг шатлалтай болгож байгаа.

Магадгүй таньдаг хүнээ ТЗ5 ангиллын тав дахь шатлалаар цалинжуулж, таньдаггүй хүнээ ТЗ5 ангиллын нэг дэх шатлалаар цалинжуулдаг гажуудал гарч болзошгүй байсан. Энэ гажуудлыг арилгасан гэсэн үг. 

Албан тушаалын тодорхойлолтыг томилох гэж байгаа хувь хүнд тааруулан баталдаг байлаа. Харин одоо Төрийн албаны Зөвлөлөөс хянан баталдаг болсон. Энэ мэтчилэн шинэчлэл, чадавхжуулах ойлголт байгаа.

Чиг үүрэг өөрчлөгдөөгүй байхад бүтцийн өөрчлөлт хийдэг болчхоод байгаа юм. Дээд шатны байгууллага төрийн албаны үлгэр дуурайл, толь байх ёстой" хэмээн Д.Баатарсайхан гишүүн ярилаа.