П.Наранбаяр: Багш, ажилчдынхаа цалин хөлсийг нэмэгдүүлэх саналыг ГБХНХЯ руу тасралтгүй явуулна
Багшлах эрхийн гэрчилгээ олгох, гэрээт багшийн талаар Боловсролын сайд П.Наранбаяр өнөөдөр мэдээлэл хийлээ.
Тэрбээр хэлэхдээ "Энэ жилээс эхлэн 44-өөс дээш хүүхэд дүүргэлттэй бүлгүүдэд багшийн туслахыг оруулж ирж ажиллуулна. Журам, тушаал нь гарсан.
Багшийн туслахыг ажиллуулснаар яах вэ?
Ядахдаа сурагчдын дэвтрийг засаж, ангид нь дэг журам тогтоогоод өгчихдөг болно.
Багшийн ачаалал их, нөөц хомс болсноор хүүхдийн сурах эрхийг зөрчиж байна. Энэ бол олон цогц арга хэмжээний зөвхөн нэг хэсэг гэдгийг онцлон хэлье.
Багшийн мэргэжлийн тасралтгүй хөгжлийг дэмжих арга хэмжээг шинэчлэн хэрэгжүүлэхэд бэлэн болоод байгаа. Энэ чиглэлд Кембрижийн баг бидэнтэй хамтарч ажиллаж байна.
2028 он хүртэл дундаас дээш ангийн хүүхдийн тоо өсөж байгаа. Энэ үзүүлэлт 2030 онд тогтворжих хандлагатай байгаа юм. Иймд дээрх арга хэмжээг тодорхой хугацаанд хэрэгжүүлэх юм.
Илүү чадварлаг багшийг бэлддэг тогтолцоог бий болгоно. Багш мэргэжилтэй ч багшилдаггүй нөөц олон байна. Тэднийг салбарт нь буцаан оруулах, ахмад багш нар болон чадварлаг боловсон хүчнийг багшлуулах арга хэмжээг үе шаттай хэрэгжүүлнэ" хэмээв.
Цалингийн тухайд:
Энэ талаар "Цалин нэмнэ гэдэг нь макро эдийн засагтай холбоотой асуудал.
Монгол Улсын Засгийн газар өнөөдөр ямар бодлого барьж байна вэ?
226,000 төрийн албан хаагчийн 120,000 нь боловсролын салбарт ажиллаж байна. Аль нэг салбарын цалинг шууд суга өсгөхдөө биш цагдаа, эмч болон бусад төрийн үйлчилгээний албанд ажиллаж байгаа хүмүүсийн цалинг өсгөх бодлогыг барина.
"Төрөөс ямар нэгэн төлбөрийн хөнгөлөлт, тусламж үзүүлэхгүй"
Багшлах эрхийн гэрчилгээ олгох тухай "Энэ бол багш нарын үнэ цэн, үнэлэмжийг бууруулж байгаа явдал огт биш. Багшийн мэргэжил бус, багшлах эрхийг нь олгож байгаа явдал.
Үндсэн багш нарт нөлөөлөхгүй. Харин үндсэн багш нарын ажлын ачааллыг бууруулахад хамгийн хэрэгтэй шийдвэр. Багшилж үзээд цаашдаа энэ мэргэжлээр ажиллах сонирхолтой байвал мэргэжлийн багш болгох, хөрвөх сургалтуудыг оруулж ирнэ.
Төрөөс ямар нэгэн төлбөрийн хөнгөлөлт, тусламж үзүүлэхгүй. Эцэст нь хэлэхэд амралтын хоёр өдөрт над руу багшлах эрх олгох талаар мэдээлэл асууж сонирхсон, багшлах хүсэлтэй хүмүүс хэдэн зуугаараа холбогдсон" гэдгийг Боловсролын сайд П.Наранбаяр ярилаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
22 СЭТГЭГДЭЛТЭЙ
|
