Гэрэл зургийг MPA агентлагийн онцгой зөвшөөрөлтэйгөөр ашиглав

Би Эй Эф Эс Экс Монголиа ХХК-ийн хөрөнгө оруулалтаар хэрэгжиж буй Төв аймгийн Баянчандмань сумын нутаг дэвсгэрт баригдах 21 Мвт-ын нарны цахилгаан станцын шав тавих ёслол энэ сарын 9-ний өдөр боллоо. 

Уг төслийг Би Эй Эф Эс Экс Монголиа ХХК болон Солар Энержи Чандмань ХХК хамтран хэрэгжүүлж байгаа бөгөөд цахилгаан станц нийт 55 Га талбайг хамарч байгаа ба нэг жилд 37сая кВт.ц эрчим хүч үйлдвэрлэх чадалтай аж. 

Түүнчлэн 20,000 айлыг эрчим хүчээр хангаж, нүүрс хүчлийн хийг 32,000 тонноор, хүлэмжийн хийн ялгаруулалтыг жилд ойролцоогоор 22,000 тонноор бууруулна гэж тооцоолжээ. 

"Монгол Улсын сэргээгдэх эрчим хүчний салбар асар их нөөц бололцоотой"

 

Гэрэл зургийг MPA агентлагийн онцгой зөвшөөрөлтэйгөөр ашиглав

BAFS Clean Energy Corporation Co., Ltd-ийн Гүйцэтгэх захирал M.L.Nathasit Diskul шав тавих ёслолыг нээж төслийн талаар дараах зүйлсийг онцлов. 

Тэрбээр "Энэ өдөр "Солар Энержи Чандмань" төслийн шав тавих ёслолын зэрэгцээ Монгол Улс болон Тайландын Хаант Улсын хооронд дипломат харилцаа тогтоосны 50 жилийн ойн баярыг тэмдэглэж буй бөгөөд энэхүү тохиол нь хоёр улсын хамтын хичээл зүтгэлээр бүтээж буй гэрэлт ирээдүйн бэлгэдэл, онцгой тохиол мөн билээ. 

Чандмань нарны цахилгаан станцын төсөл бол зөвхөн эрчим хүчний дэд бүтцийн хөрөнгө оруулалт бус, хоёр улсын, цаашлаад дэлхийн тогтвортой хөгжил, илүү цэвэр, ногоон ирээдүйн төлөөх бидний хамтын тууштай зүтгэлийн илэрхийлэл юм. Бидний харж буйгаар Монгол улсын сэргээгдэх эрчим хүчний салбар асар их нөөц бололцоотой бөгөөд бид өөрсдийн туршлага, нөөц бололцоогоо мөнх хөх тэнгэрийн эх оронд нарнаас эрчим хүч үйлдвэрлэх үйлсэд хувь нэмэр оруулах болсондоо туйлын баяртай байна. 

Чандмань нарны цахилгаан станц зөвхөн эрчим хүч үйлдвэрлээд зогсохгүй, шинэ ажлын байр, шинэ технологийг нэвтрүүлж, Монгол улс эрчим хүчний тусгаар тогтнолд хувь нэмэр оруулах  ирээдүйн олон боломжийн үүд хаалгыг нээх юм. 

Чандмань төслийг бид хоёр улсын ирээдүйд хамтдаа хэрэгжүүлэх олон төслийн дөнгөж эхлэл нь гэж харж байна. Цаашид бид Монгол Улсын тогтвортой хөгжил, амжилт дэвшилтэт ирээдүйн төлөөх аялалд урт хугацааны түнш байхын төлөө үргэлжлүүлэн тууштай ажиллах болно" гэв. 

"Эрчим хүчний салбарын оргил ачааллын асуудалд маш том хувь нэмэр оруулна гэж тооцоолж байна"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Би Эй Эф Эс Экс Монголиа ХХК-ийн Гүйцэтгэх захирал Л.Жавхлангаас уг төслийн талаар дараах зүйлсийг тодруулав. 

- Төсөл хэдэн үе шаттай хэрэгжих вэ? 

- Өнөөдөр шаваа тавилаа. Энэ сардаа багтаад үерийн далан барих, удирдлагын барилгын суурийг хийх, хашаа барих зэрэг ажлуудыг эхлүүлнэ. Үндсэн барилгын ажил ирэх оны хавар эхэлнэ. Дараа жилийн өдийд ашиглалтад оруулахаар төлөвлөж байна. 

- Хүрэх үр дүнг юу гэж харж байна вэ? 

- Зөвхөн нарны эрчим хүчээр зогсохгүй батарей хуримтлууртай хамт баригдаж байгаагаараа онцлог төсөл юм. Тиймдээ ч манай улсын эрчим хүчний салбарт тулгамдаж буй оргил ачааллын асуудалд маш том хувь нэмэр оруулна гэж тооцоолж байгаа. Түүнчлэн барилгын ажлын явцад 100 гаран ажилчид талбай дээр ажиллана. Цаашлаад ашиглалтад орсны дараа харуул хамгаалалт, цахилгааны инженер, засвар үйлчилгээ зэргийг хариуцах ажилчдыг Баянчандмань сумын иргэдээс авч ажиллуулахыг эрмэлзэж байна. 

- Төслийн санхүүжилт хаанаас хийгдэж байгаа вэ? 

- Би Эй Эф Эс Экс Монголиа ХХК нь Тайланд Улсын хөрөнгө оруулалттай компани бөгөөд энэхүү төсөл нь 100% Тайланд Улсын хөрөнгө оруулалтаар хэрэгжиж байна.

- Нарны цахилгаан станцыг барих болон ажиллах боловсон хүчний хувьд ямар байгаа вэ? 

- Энэ салбар хөгжиж эхлээд 20 гаруй жил болж байна. Хууль нь 2007 онд батлагдаж байсан. Үүнээс хойш МУИС, ШУТИС зэрэг сургуулиудад сэргээгдэх эрчим хүчний инженерүүд маш олноор бэлтгэгдэж байгаа. 
Түүнчлэн монгол компаниуд маш туршлагатай болж олон улсад өрсөлдөхүйц ерөнхий гүйцэтгэгч хэд хэдэн компанитай болсон байна. Хүн хүч мэдлэгээрээ олон улсад өрсөлдөхүйц болсон гэж харж байгаа. 

ФОТО: