Т.Бат-Эрдэнэ: Сумын сургуулийн интернэтийн хурд хангалтгүй байгаа нь боловсролын контентын хүртээмжид нөлөөлнө

Гэрэл зургийг MPA агентлагийн онцгой зөвшөөрөлтэйгөөр ашиглав

Нэгдсэн Үндэстний Байгууллага (НҮБ)-ын Хүүхдийн сан болон Олон улсын цахилгаан холбооны байгууллага (UNICEF, ITU)-ын GiGa санаачилгын хүрээнд “Боловсролын салбарын цахим хуваагдал” сэдэвт хэлэлцүүлэг өнөөдөр зохион байгуулагдав. 

Энэ үеэр ерөнхий боловсролын сургуулиудын интернэт холболтын талаар Боловсролын яамны Цахим боловсролын газрын дарга Т.Бат-Эрдэнээс тодрууллаа. 

Тэрбээр "Манай улсад 696 төрийн өмчит ерөнхий боловсролын сургууль үйл ажиллагаа явуулж байна. 

Эдгээр сургуульд 100 хувь интернэт очсон. Гэхдээ зарим сургуулиуд бага, дунд, ахлах зэргээр 2-3 хичээлийн байртай байх нь элбэг. Өөрөөр хэлбэл нийт 1,339 хичээлийн байр улсын хэмжээнд бий. 

Хичээлийн байраар тооцвол 67.3 хувь нь интернэтэд холбогдож чадсан. Алслагдсан зарим баг, сумын 57 цэгт өндөр өртөг бүхий сансрын интернэт авдаг. Гэхдээ дэд бүтцийн хувьд дэлхийн дунджаас сайн үзүүлэлттэй байгаа.

Төвөөс алслагдсан сургуулиудад старлинк, нам орбитын технологи зэргээр өндөр хурдны интернэтийг нэвтрүүлэх хэрэгцээ үүсээд байна.

Жишээ нь ихэнх сумын сургуулийн интернэтийн дундаж хурд 4-10Mpbs бол заримдаа бүр 1Mbps хүрэхгүй тохиолдол их байна. Энгийнээр хэлбэл ийм бага интернэтээр видео, зураг гацаад үзэж чадахгүй тохиолдол бий.

Өнгөрсөн жилээс математикийн сургалтын Eduten, англи хэлний Pearson зэрэг хөтөлбөрийг хэрэгжүүлж эхэлсэн. Эдгээрийг ерөнхий боловсролын аль ч сургуулийн сурагчдад хүргэхэд интернэтийн холболт чухал үүрэг гүйцэтгэнэ. Тиймээс ч Giga төсөл чухал ач холбогдолтой. 

Бид суурь дэд бүтцээ сайжруулаагүй тохиолдолд Баян-Өлгий аймгийн Сагсай сум, Завхан аймгийн Завханмандал сум эсвэл Дорнодын Халх голд байгаа сурагчдад боловсролын контентуудыг тэгш хүртээмжтэй, чанарын шаардлага хангасан түвшинд хүргэж чадахгүй" хэмээв. 

Үргэлжлүүлэн "Giga төсөл нь сургуулиуд өдөр тутам ямар хурдтай интернэт ашиглаж байгааг тогтмол хянадаг тогтолцоог бий болгосон. Нэг ёсондоо төхөөрөмж рүү дохио өгөөд Завхан аймгийн Завханмандал сум ямар хэмжээний хурдтай интернэтийг яг одоо хэрэглэж байгааг тооцож гаргадаг нэгдсэн дэд бүтэц бүхий сүлжээ. 

Энэ сүлжээ бий болсноор бүх сургуулийнхаа интернэт холболтыг хянаж чадна. 

Түүнчлэн Giga төслийн хүрээнд техникийн дэмжлэг үзүүлэх боломж бий. Тодруулбал НҮБ-ын Хүүхдийн сан, ЮНИСЕФ-ээс Giga төслийн хүрээнд хөрөнгө оруулалтыг бусад олон улсын донор байгууллагаас боломж бүрдэх юм" гэлээ.