The MongolZ баг "Esports World Cup 2024" тэмцээний хасагдах шатны төлөөх эхний тоглолтод хожигдлоо
Саудын Арабын Рияад хотод "Esports World Cup 2024" буюу цахим спортын төрлүүдийг багтаасан 60 сая ам.долларын шагналын сантай томоохон тэмцээн болж байгаа билээ.
Тус тэмцээний "Counter Strike 2" тоглоомын төрөл нь нэг сая ам.долларын шагналын сантай бөгөөд Ази тивийг төлөөлж манай улсын "The Mongolz" баг оролцож байгаа юм.
Дэлийн шилдэг 15 багийн 14 нь opening stage буюу эхний шатанд ВО3(гурван үе тоглож ялагчийг тодруулах) журмаар хоорондоо тоглож, ялсан нь play off шат руу дэвшинэ.
Хэрэв эхний шатанд хожигдвол Play-In шатнаас тэмцээнээ үргэлжлүүлэх боломжтой юм. Play-In шатнаас зөвхөн нэг баг play off-д өрсөлдөх эрхээ авна.
Тэгвэл манай улсын баг opening stage шатны тоглолтоо дэлхийн чансааны зургаадугаар байрт эрэмбэлэгдэж буй Германы "G2 Esports" багийн эсрэг хийж, 0:2 онооны харьцаатайгаар хожигдлоо.
Ингэснээр "The Mongolz" багийн хувьд Play-In шатнаас уг тэмцээнийг үргэлжлүүлэхээр болж байна. Тэд маргааш ВО1 журмаар эхний шатанд хожигдсон багуудын аль нэгтэй нь тоглох юм.
Play-In шатны бүх тоглолт ВО1 журмаар маргааш явагдаж дуусах бөгөөд зөвхөн нэг баг нь play off шат руу дэвшинэ. Рlay off шатны найман багаас "Esports World Cup 2024" тэмцээний CS2 тоглоомын төрлийн аварга тодорно.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
