Уншиж байна ...

ВИДЕО: Ким Жон Уныг орж ирэхээс өмнө суудал эзэлсэн Оросын сайд нарыг Умард Солонгосын түшмэл өрөөнөөс гаргажээ

Т.Давааням, ikon.mn
2024 оны 6 сарын 20
iKon.MN
Зураг зураг

ОХУ-ын ерөнхийлөгч Владимир Путинийг дагалдан Пёнянд очсон сайд нар өчигдөр эвгүй байдалд орсныг Умард Солонгосын төв хэвлэлийн дамжуулсан айлчлалын дүрс бичлэг харуулжээ.

Хоёр улсын удирдагчдын яриа хэлэлцээ болох тасалгаанд эхлээд Оросын засгийн газрын сайд нар орж ирцгээсэн байна.

Гадаад хэргийн сайд Сергей Лавров хамгийн түрүүнд орж ирээд ширээнд суухдаа ямар нэг бохир зүйлийн талаар гомдоллож байв.

Түүний хажууд засгийн газрын тэргүүн шадар сайд Денис Мантуров, шадар сайд Виталий Савельев нар сууцгаажээ.

Дараа нь шадар сайд Александр Новак, батлан хамгаалахын сайд Андрей Белоусов, эрүүл мэндийн сайд Михаил Мурашко, Роскосмосын тэргүүн Юрий Борисов нар тасалгаанд орж ирцгээсэн байна.

Гэтэл энэ үеэр Умард Солонгосын нэгэн албаны хүн тэднийг тасалгаанаас даруй гарахыг шаарджээ.

Оросын нэг төлөөлөгч үүний хариуд “Тэгвэл биднийг яах гэж оруулсан юм бэ?” гэж хэлж байгаа нь бичигдсэн байна.

“Манай протокол ийм. Удирдагчид удахгүй орж ирнэ. Дараа нь та нарыг ширээнд урих ёстой” гэж Умард Солонгосын төлөөлөгч тайлбарлажээ.

Оросын төлөөлөгч энэ үеэр “Та нар эхлээд хэлэх ёстой байсан юм” хэмээн бухимдаж байв.

Үүний дараа энэ дүрс дамжуулалтыг тасалж, хэсэг хугацааны дараа Ким, Путин нар ширээний ард суусан мөчөөс эхлэн үргэлжлүүлсэн байна.

 

Эх сурвалж: The Moscow Times