С.Мягмарсүрэн: Бугын эвэр түүхээр ойд явсан иргэн баавгайд бариулж нас барсан байна
Ойд явж байсан иргэн баавгайд бариулж нас барсан харамсалтай хэрэг гарчээ.
Энэ талаар ЦЕГ-ын Урьдчилан сэргийлэх газрын мэргэжилтэн, цагдаагийн дэслэгч С.Мягмарсүрэн "Бугын эвэр түүхээр ойн гүн рүү орж, баавгайд бариулсан байж болзошгүй хэрэг Хөвсгөл аймгийн Цагаан-Үүр суманд гарлаа.
Өнгөрсөн тавдугаар сарын 31-ний өдөр энэ тухай дуудлага аймгийн цагдаагийн газарт бүртгэгдсэн. Алба хаагчид хэргийн газарт машинтай очих боломжгүй байсан тул 100 гаруй км замыг мориор туулж очсон байна.
Мөрдөн шалгах ажиллагаагаар тус аймгийн харьяат, 50 настай иргэн энэ оны тавдугаар сарын 20-ны өдөр бугын эвэр түүхээр Цагаан-Үүр суманд очиж, тавдугаар сарын 27-ны өдөр ойд явж байхдаа баавгайд бариулж, амь насаа алдсан байдал тогтоогдлоо.
Иймд аялал жуулчлалын улирал эхэлсэн энэ үед зарим иргэн ан гөрөө хийх, эмийн ургамал түүх зорилгоор баталгаагүй замаар явж, амь нас эрүүл мэндээрээ хохирох эрсдэл байдаг тул өөрийн болон бусдын аюулгүй байдлыг сахин хамгаалахыг сэрэмжлүүлж байна" гэж мэдээллээ.
Баавгай тааралдвал айлгаж, цочоохгүй байхыг мэргэжилтнүүд зөвлөж байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
32 СЭТГЭГДЭЛТЭЙ
|
