Майкрософт компани хиймэл оюуны технологиор сайжруулсан шинэ персонал компьютер танилцууллаа

Майкрософт компани хиймэл оюуны технологиор хүчитгэж, сайжруулсан цоо шинэ Windows персонал компьютер зах зээлд гаргах гэж байгаагаа Даваа гарагт танилцуулжээ.

“Copilot+ PC” гэж нэрлэж буй уг бүтээгдэхүүнээ тус компани өнөөдрийг хүртэлх хамгийн хурдан, хамгийн ухаалаг Windows компьютер гэж тодорхойлсон байна.

“Бид персонал компьютерын цахиураас эхлээд үйлдлийн систем, хэрэглээний давхарга, үүл (cloud) хүртэл бүгдийг шинээр харж, Windows платформын хиймэл оюун ухааныг цөмөө болгосон сүүлийн хэдэн арван жилийн хамгийн чухал өөрчлөлтийг танилцуулж байна” гэж Майкрософт мэдэгджээ.

Тус компани өөрийн Surface брэндийн Copilot+ PC-нүүдийг Surface Pro, Surface Laptop нэрээр зах зээлд гаргаж байгаагаас гадна Acer, ASUS, Dell, HP, Lenovo, Samsung зэрэг үйлдвэрлэгчдэд бас өөр өөрийн Copilot+ компьютер зах зээлд гаргах боломжийг олгох юм байна.

Майкрософтын өөрийнх нь шинэ компьютерүүдийн эхлэх үнэ $999 бөгөөд урьдчилсан захиалга нь Даваа гарагт эхэлжээ. Худалдаанд гарах хугацаа нь зургаадугаар сарын 18-ны өдөр ажээ.

Copilot+ PC-нүүдийн гол давуу тал нь системийн гүнд хүртэл нэвтэрсэн хиймэл оюуны хэрэглээнүүд юм байна.

Тухайлбал зарим хэрэглээ нь бүр AI хагас дамжуулагч чипний түвшинд суурилагджээ.

Жишээлбэл “Recall” функц нь тухайн компьютерын фото ой санамжийн үүрэг гүйцэтгэдэг бөгөөд хэзээ ямар үйлдэл хийж байсныг маш хурднаар сэргээн харуулдаг гэнэ.

Шинэ PC-нүүд хиймэл оюуны хэрэглээнүүдийг ердийн компьютерүүдтэй харьцуулахад 20 дахин хурдтай ажиллуулж, батарейн бүрэн цэнэгээрээ 22 цаг хүртэл ажилладаг тухай Майкрософт мэдээлжээ.

CPU, GPU болон NPU (Neural Processing Unit) чипүүдийг холбосон шинэ дотоод архитектур нь хиймэл оюуны хэрэглээг хурдасгах гол хүчин зүйл болж байгаа гэнэ.

Шинэ PC-нүүд бас тухайн компьютер дээр тоглогдож буй бүх аудио, видео агуулгыг бодит цагийн горимд англи хэлний текст рүү хөрвүүлэх “live caption” чадвартай болсон байна.

Ийм чадварыг англиас өөр 40 гаруй хэл дээр ашиглах боломжтой гэнэ.

Copilot+ PC-нүүд гар дээрээ “Copilot” товчтой болсон нь хиймэл оюуны хэрэглээнүүдэд шууд хандах боломж олгодог юм байна.

Эх сурвалж: Business Insider