Гуам арлын захиргаа Өмнөд Солонгосын жуулчны амийг хөнөөсөн хэргийн талаар мэдээлэлд $50,000-ын шагнал амлав

Пүрэв гарагийн үдэш Номхон далайн Гуам арлын амралтын газарт Өмнөд Солонгосын нэг жуулчин буудуулж алагдсан юм.

Арлын захиргаа уг аллагатай холбоотой мэдээлэл өгсөн хүнийг $50,000-аар шагнах болсныг Баасан гарагт зарлажээ.

Тухайн өдрийн оройн 08:00 цагийн үед Гуам арлын аялал жуулчлалын бүс Тумон буланд байрладаг Tsubaki Towers зочид буудлын зүгт хохирогч эрэгтэй эхнэрийн хамт алхаж явсан байна.

Энэ үед хуучин загварын бараан өнгөтэй SUV ангиллын автомашин хохирогчийн араас ойртож очсоныг Гуам арлын цагдаагийн газрын дарга Стефен Игнасио хэвлэлийн хурлын үеэр мэдээлжээ.

Автомашинд явсан зорчигч хохирогчид буу тулгаад эд зүйлээ өгөхийг шаардсан байна.

Тэтгэвэрт гарснаа тэмдэглэх зорилгоор Гуамд ирсэн хохирогч маргааш өглөө нь шархаа даалгүй эмнэлэгт нас баржээ.

АНУ-ын газар нутагт тооцогддог Гуам нь Хавайн арлуудаас баруун зүгт 6,257 км зайд оршдог, 170,000 орчим хүн амтай арал юм.

Далайн зөөлөн дулаан уур амьсгалтай уг арал ойролцоох Азийн орнуудын иргэдийн аялж, амрах нэг гол чиглэл болдог.

Өнгөрсөн оны эхний есөн сард Өмнөд Солонгосоос 270,000 орчим жуулчин ирсэн нь бусад улсуудын жуулчдаас хамгийн олон нь байжээ.

Гуам аралд бас АНУ-ын цэргийн томоохон бааз байрладаг. Арлын эдийн засаг АНУ-ын төсвийн зардал болон аялал жуулчлалын орлогоос өндөр хамааралтай юм.

Тиймээс хамгийн олон жуулчин ирдэг улсын иргэний аминд халдсан хэргийг шуурхай илрүүлэх нь Гуамын эрх баригчдын хувьд чухал болоод байна.

Хэргийн дараа Гуам арлын захирагч хохирогчийн эхнэрийг хүлээн авч уулзжээ.

Дараа нь тэр Инстаграм хуудсандаа видео мэдэгдэл цацсан юм.

“Би түүнийг тайвшруулж, тэвэрч, аргадаж, хамтдаа уйллаа. Би эхнэр, ээж хүнийхээ хувьд түүний зовлонг мэдэрч байна” гэж захирагч Лу Леон Герреро мэдэгдэлдээ өгүүлжээ.

Тэр бас хэргийг шийдвэрлэхэд туслахыг Гуамын ард иргэдэд уриалсан байна.

“Гуам бол аюулгүй, тайван газар. Бид зөвхөн ард иргэдийнхээ төдийгүй гадаадын зочдын аюулгүй байдлыг хангахын төлөө чадах бүхнээ хийсээр байх болно” гэж захирагч мэдэгджээ.

Эх сурвалж: Associated Press