"Сүхбаатар аймгийн Мөнххаан, Түмэнцогт сум болон Дорнодын нутгаар авто замын үзэгдэх орчин хязгаарлагдаж байна"

Гэрэл зургийг MPA агентлагийн онцгой зөвшөөрөлтэйгөөр ашиглав

УОК-оос цаг агаарын нөхцөл байдлын талаар мэдээлэл өглөө.

Нарийн бичгийн дарга Т.Баярхүү "Ойрын өдрүүдэд нийт нутгаар цаг агаарын нөхцөл байдал хүндэрч, өнөөдрөөс/2023.11.22/ хүйтний эрч чангарч байна.

Өчигдөр Өмнөговь, Дундговь, Дорноговь аймгийн нутгаар ахиу цас орж, шуурсан. Онцгой байдлын байгууллагад гурван аймгийн хэмжээнд цасанд суусан таван дуудлагатай хонолоо.

Өнөөдөр Хэнтий, Дорнод, Сүхбаатар аймгийн нутгаар цасан шуургатай байна. Одоогийн байдлаар Сүхбаатар аймгийн Мөнххаан, Түмэнцогт сум болон Дорнод аймгийн нутгаар цасаар шуурч, авто замын үзэгдэх орчин хязгаарлагдаж байна.

Үзэгдэх орчин хязгаарлагдаж байгаа учраас цаг уурын байгууллагаас өгч байгаа мэдээллийг дагаж, аюулгүй байдлаа хангахыг иргэддээ зөвлөе" гэв.

ЦУОШГ: Арваннэгдүгээр сарын 23-ны 20:00 цаг хүртэлх цаг агаарын урьдчилсан мэдээ

Өнөө шөнө Сүхбаатарын зүүн, Дорнодын өмнөд хэсгээр цасан шуурга шуурахыг анхааруулж байна.

Хур тунадас: Нутгийн зүүн хэсгээр үүлэрхэг, бусад нутгаар багавтар үүлтэй. Шөнөдөө зүүн аймгуудын нутгийн зүүн хэсгээр цас орж, цасан шуурга шуурна. Өдөртөө нийт нутгаар цас орохгүй.

Салхи: Ихэнх нутгаар баруун хойноос секундэд 5-10 метр, говь, тал, хээрийн нутгаар секундэд 12-14 метр хүрч ширүүснэ.

Агаарын температур: Шөнөдөө Дархадын хотгор, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Туул, Тэрэлж голын хөндийгөөр -30...-35 градус, Хангайн уулархаг нутаг, Хараа, Ерөө, Эг, Үүр, Хэрлэн, Онон, Улз голын хөндийгөөр -25...-30 градус, Алтайн өвөр говиор -11...-16 градус, Дорнодын тал нутгаар -15...-20 градус хүйтэн.

Бусад нутгаар -21...-26 градус, өдөртөө Дархадын хотгор, Завхан голын эх, Хэнтийн уулархаг нутаг, Дорнод-Дарьгангын тал нутаг, Хэрлэн, Тэрэлж голын хөндийгөөр -18...-23 градус, Хангай, Хөвсгөлийн уулархаг нутаг, Идэр, Тэс, Орхон, Сэлэнгэ, Хараа, Ерөө, Туул, Онон, Улз голын хөндийгөөр -14...-19 градус, Их нууруудын хотгор, Алтайн өвөр говиор -1...-6 градус, бусад нутгаар -8...-13 градус хүйтэн байна.