"Ногоон автобуснаас болж иргэдээ бухимдуулсанд, хүмүүсийн дутуу хийсэн зүйлийн өмнөөс уучлалт хүсэж байна"

Гэрэл зургийг MPA агентлагийн онцгой зөвшөөрөлтэйгөөр ашиглав

Хотын дарга Д.Сумъяабазар ажлаасаа чөлөөлөх өргөдлөө Ерөнхий сайдад өнөөдөр өгсөн талаараа мэдээлэл хийлээ. 

Тэрбээр "Би Нийслэлийн Засаг даргын ажлаа авснаасаа хойш Эрх зүй, Эдийн Засаг, Эрүүл засаглал гэсэн гурван суурьт хөтөлбөрийг бий болгохыг зорьж, УИХ-ын гишүүнээс өөрийн хүсэлтээр чөлөөлөгдөж, төрж, өссөн Улаанбаатар хотынхоо хөгжлийн төлөө ажиллахыг хичээлээ.

Ажлаа 2020 оны аравдугаар сарын 23-нд хүлээж аваад, Улаанбаатар хотод сүүлийн 30 гаруй жилийн хугацаанд үүссэн, тулгамдсан асуудлыг шийдэхийг зорьж ажиллахаа илэрхийлж байсан. Энэ хүрээнд УИХ, Засгийн газартайгаа хамтран ажиллаж, Улаанбаатар хотоос сонгогдсон гишүүд төдийгүй орон нутгаас сонгогдсон гишүүд нэгдэн Улаанбаатар хотын хөгжлийн асуудал эрхэлсэн түр хороог УИХ-д анх удаа байгуулж, эрх зүйн хүрээнд шинэчлэлүүдийг хийхэд анхаарч ажиллалаа.

Коронавирусийн хүнд хэцүү үе байсан хэдий ч Нийслэл Улаанбаатар хотын эрх зүйн байдлын тухай хуулийг 27 жилийн дараа шинэчлэн батлуулж чадсан. Ингэснээр нийслэл хот анх удаа бонд гаргах эрхтэй болж, энэ нь ажил хэрэг болоод явж байна. Мөн анх удаа Нийслэлийн Бодлогын судалгаа, шинжилгээний төвийг байгууллаа. Тооцоо, судалгаатай байж хотын тулгамдсан асуудлыг урт болон дунд хугацаанд шийднэ. Энэ байгууллага дотоод, гадаадын эрдэм шинжилгээний хүрээлэн, их, дээд сургуулийн эрдэмтэн, судлаачидтай хамтран ажиллаж байна.

Ажлаа авснаас хойш коронавирус, жагсаал цуглаан, үерийн нөхцөл байдал гээд олон амаргүй үетэй нүүр тулсан. Эдгээрийг УИХ, Засгийн газар, аж ахуйн нэгж, иргэний нийгмийн байгууллагуудтай, иргэдтэйгээ ойлголцож, хамтран ажиллаж даван тууллаа. Хот бол нэг нам, хэсэг бүлэг хүмүүс, нэг хүний удирдлагаар явдаг зүйл биш.

Хотын тулгамдаж байгаа асуудлыг УИХ-ын түвшинд, хууль, эрх зүй түвшинд шийдэж, Улаанбаатар хотын багц хуулийг батлуулах нь хотын иргэдийн эрүүл, аюулгүй орчинд амьдрах нөхцөлийг бүрдүүлэх суурь нь болно. Эрх зүй, эдийн засгийн чадамжгүйгээр бидний хүсээд байгаа хотыг бий болгох боломжгүй.

Дараагийн Хотын дарга энэ чөдөр, тушаанд битгий автаасай. УИХ, Засгийн газрын түвшин дэх бидний ойлголцлыг үргэлжлүүлж яваасай. Засгийн газрын 2021 оны тавдугаар сарын 19-ний 146 дугаар тогтоолоор нийслэл Улаанбаатар хотын хөрөнгө оруулалтыг 420 тэрбум төгрөгөөс бууруулахгүй байх түүхэн шийдвэр гаргасныг үргэлжлүүлж, хотын иргэдийн тулгамдсан асуудлыг шийдэх хэрэгтэй. Цаашид Улаанбаатар хотын эрх зүйн чадамжийг сайжруулж, Улаанбаатар хотын багц хуулийг боловсруулах хэрэгтэй.

Өнгөрсөн хугацаанд хотын эрх зүйн чадамжийг нэмэгдүүлж, зөвшөөрөлгүй гарааш, хашаа хайсыг чөлөөлж, ногоон байгууламжаа нэмж, явган замаа өргөжүүлэн, стандарттай болголоо.

Автобусны худалдан авалттай холбоотойгоор иргэдийгээ бухимдуулсандаа уучлал хүсэж байна. Автобуснуудыг Сүхбаатарын талбайд ил тавьж, иргэддээ танилцуулж, шаардлага хангахгүй бол буцаах болно гэдэг байр суурьтай байснаа хэлье. Хууль хяналтын байгууллага шалгаж, хууль, дүрмийн хүрээнд шийдэх ёстой.

Өвөлжилтийн бэлтгэл ажлыг шуурхай хангах учиртай. Зам засварын ажлуудыг дуусгах шаардлагатай. Мөн хотын хөгжлийг дэмжих, бүтээн байгуулалтыг түргэсгэх бондын ажил, Сэлбэ гол дагуух зөвшөөрөлгүй барилга, байгууламжийг буулгах, иргэдийн эрүүл, аюулгүй орчинд амьдрах нөхцөлийг хангасан далангуудыг яаралтай байгуулах хэрэгтэй байна.

Хотын ажил цаашид зогсолтгүй үргэлжлэх учиртай. Иймээс ч Монгол Улсын Ерөнхий сайд, МАН-ын дарга Л.Оюун-Эрдэнэтэй ярилцаж, хотын ажлыг эрчимтэй явуулах үүднээс ажлаа өгч, дараагийн Хотын даргыг томилохыг хүслээ.

Намайг дэмжиж, үргэлж хурцалж, шударга шүүмжилж ирсэн хүн бүрд талархал илэрхийлье. Хот гэдэг бол нэг хүний ажил биш. Надтай мөр зэрэгцэн ажилласан нийт төрийн албан хаагчдадаа, хотын иргэддээ талархаж байна. Өөрийн хүсэлтээр, ёс зүйн хариуцлагаа хүлээж, албан тушаалаасаа огцорч байгаа тул уг шийдвэрийг минь бүү улс төржүүлээрэй.

Албан тушаалаас чөлөөлөгдөх шийдвэрт маань улс төрийн нөлөө, дарамт шахалт огт байхгүй. Төрийн ажил, хотын ажил цаашид үргэлжлэх ёстой. Тиймээс ёс зүйгээ баримтлаад өөрийн хүсэлтээр ажлаас чөлөөлөгдөх хүсэлтээ өгч байна.

Согтуугаар хүн дайрсан гэх асуудал огт байхгүй. Би архи амсаагүй жил орчим болж байна.

Автобусны асуудлын хувьд "Эрдэм транс", "Тэнүүн-Огоо" компанийн захирлуудтай би нэг ч уулзаж байгаагүй. Энэ компанийн үйл ажиллагааг нь хувийн хэвшилтэй холбоотой асуудлыг дэмжиж корпорацын зохион байгуулалттайгаар ажиллах нь зөв юм байна гэдгийг Д.Амарбаясгалан дарга өөрөө санаачилж хэлж уулзуулж байсан түүхтэй шүү.

Ногоон автобуснаас болж иргэдээ бухимдуулсандаа, хүмүүсийн дутуу дулимаг хийсэн зүйлүүдийн өмнөөс уучлалт хүсэж байна. Энийг нууж хаагаад өнгөрүүлэлгүй, автобуснуудыг хүлээж авалгүйгээр Сүхбаатарын талбай дээр бүгдийг нь ил гаргаж ард иргэдийн сэтгэл санаанд нийцэж байгаа бол хүлээж авна, үгүй бол бүгдийг нь буцаана гэсэн байр суурьтай байсан. 

Хотын даргын ажил үнэхээр хэцүү юм байна. Дараагийн хотын даргаа хайрлаарай даа. Хүний төлөө ажиллаж байгаа учраас буруу шийдвэр гаргахыг үгүйсгэхгүй. 

Би цэвэр өөрийнхөө хүсэлтээр ёс зүйн хариуцлагаа хүлээж байна. Би бол ард түмнийхээ өмнө цолоо дуудуулдаг Монгол Улсын аварга хүн шүү дээ. Энэ цол надтай насаараа явна. Тийм учраас би ард түмэндээ хүндэтгэлтэй хандах ёстой. 

Надад Богд ууланд газар байхгүй,  0.07 га газар ч байхгүй. Зуслангийн байшин ч байхгүй. 

Акуа гарденыг нураана. Шүүхийн шийдвэрийг дагаад захирамж гарсан. Дунд нь 2020 оны есдүгээр сарын 30-ны өдөр  зүгээр байсан газрыг цуцалсан шийдвэр гаргасан. Орон нутгийн сонгуулийн өмнө гарсан шийдвэр. Үүний араас та нар яваарай. Ард нь цэвэр эрх ашиг үнэртэж байна, авлигатай холбоотой асуудал байна гэж харж байгаа шүү. Тэр өдрийн шийдвэрийг хараарай.

Дунд шатны буюу агентлагийн дарга нарт авлигын асуудал байдаг.

Би энд гүлдийж суугаад бонд, автобусны асуудал ярихад надад хэн ч итгэхгүй" гэв. 

ВИДЕО: