Крым дэх ОХУ-ын Хар тэнгисийн флотын төв байр Украины пуужингийн цохилтод өртөв

Өчигдөр буюу Баасан гарагт Крымийн хойгийн Севастополь хот дахь ОХУ-ын Хар тэнгисийн флотын төв байр Украины пуужингийн цохилтод өртжээ.

ОХУ-ын батлан хамгаалах яам эхлээд нэг алба хаагч амь үрэгдсэн гэж мэдээлсэн бол сүүлд сураггүй алга болсон гэж залруулсан байна.

Бас Украины таван пуужинг агаарт устгасан тухай мэдээлжээ.

“Есдүгээр сарын 22-ны 12 цагийн үед Украины зэвсэгт хүчин эзлэгдсэн Севастополь хотод оршдог Оросын Хар тэнгисийн флотын төв байранд амжилттай цохилт өглөө” гэж Украины батлан хамгаалах яам сошиал хуудсаараа мэдээлсэн байна.

Севастополь хотын Москвагаас томилогдсон захирагч Михаил Развожаев цохилтын үеэр гал түймэр гарсан тул флотын төв удирдлагын байр оршдог хотын төвд ирэхгүй байхыг иргэдэд анхааруулжээ.

Иргэний зориулалттай байгууламж болон иргэний амь нас уг цохилтод хохироогүйг тэр бас мэдээлсэн байна.

2014 онд ОХУ-д хүчээр нэгтгэгдсэн Крымийн хойгт сүүлийн өдрүүдэд Украины армийн халдлага довтолгоо эрчимжиж байгаа.

Украины Үндэсний Аюулгүй Байдлын Зөвлөлийн нарийн бичгийн дарга Олексий Данилов одоо Оросын Хар тэнгисийн флотод сайн дураараа эсвэл албадлагаар “өөрийгөө дуусгах” хоёрхон зам үлдээд буйг өчигдөр анхааруулсан байна.

Хэрвээ сайн дурын замыг сонгохгүй бол “салями шиг хэрчигдэх”-ийг тэр X хуудсандаа анхааруулан бичжээ.

Украины ерөнхийлөгчийн зөвлөх Михайло Подоляк “Крымийг чөлөөлөх нь гарцаагүй” болохыг анхааруулсан байна.

Өчигдөр бас Крымийн хойгийн интернэтийн төв “урьд өмнө тохиолдож байгаагүй” том кибер халдлагад өртсөний улмаас холболт нь тасарсныг орон нутгийн удирдлагууд мэдээлжээ.

Эх сурвалж: Reuters