Р.Дагдан: "Улаанбаатар цахилгаан түгээх сүлжээ" ТӨХК-ийн ХҮТ-ийн чиг үүргийг хувийн хэвшилд шилжүүлэхэд хэтэрхий эртэднэ
Засгийн газрын долдугаар сарын 19-ний өдрийн хуралдааны 29 дүгээр тэмдэглэлд "Улаанбаатар цахилгаан түгээх сүлжээ" ТӨХК-ийн Хэрэглэгчдэд Үйлчлэх Төв (ХҮТ)-ийн чиг үүргийг менежментийн гэрээгээр гүйцэтгүүлэх талаар ЗГХЭГ-ын дарга Д.Амарбаясгалан танилцуулсан байна.
Тус тэмдэглэлд "Улаанбаатар цахилгаан түгээх сүлжээ" ТӨХК-ийн Хэрэглэгчдэд үйлчлэх төвийн үйл ажиллагааг заавал төрийн өмчит компани явуулах шаардлагагүй. Зардал мөнгө хэмнэх, ашигтай ажиллах үүднээс ХҮТ-ийн чиг үүргийг хувийн хэвшилд шилжүүлэх талаар яригджээ.
Үүнтэй холбогдуулан ХҮТ-ийн чиг үүргийг менежментийн гэрээний үндсэн дээр хувийн хэвшлээр гүйцэтгүүлэх, цахилгаан түгээх, хангах үйл ажиллагааг тусгай зөвшөөрлийн чиглэлээр өөрчлөн зохион байгуулах талаар ажлын хэсэг Төрийн өмчийн бодлого зохицуулалтын газарт байгуулагдаж, судалгааны үе шатандаа явагдаж байгаа аж.
ХҮТ нь 860 гаруй ажилтантай бөгөөд хэрэглэгчдийн цахилгаан эрчим хүчний заалтыг үнэн зөв бодож, борлуулах чиг үүрэгтэй байгууллага юм. Гэхдээ Засгийн газрын хуралдааны тэмдэглэлд "Улаанбаатар цахилгаан түгээх сүлжээ" ТӨХК-ийг хувьчлах, хувьцааг нь олон нийтэд худалдах асуудал яригдаагүй байна.
"Өнгөрсөн онд 358 хүн "Улаанбаатар цахилгаан түгээх сүлжээ" ТӨХК-аас хувийн шалтгаанаар ажлаасаа гарсан"
Улаанбаатар болон Төв аймгийн 460 мянган хэрэглэгчдэд 1,940 ажилтантайгаар эрчим хүч түгээх, борлуулах ажил гүйцэтгэж буй "Улаанбаатар цахилгаан түгээх сүлжээ" ТӨХК-ийн гүйцэтгэх захирал Р.Дагдангаас Хэрэглэгчдэд үйлчлэх төвийг хувьд шилжүүлэх шаардлага, хэрэгцээ байгаа эсэхийг тодрууллаа.
Тэрбээр "Эрчим хүч бол манай улсын суурь салбар. Манай салбар байхгүй бол Монголд ямар ч байгууллагын үйл ажиллагаа явахгүй, хөгжил ярихгүй. Төр нийтийн эрх ашгийн төлөө үйл ажиллагаа явуулдаг. Хэрэв хувийн хэвшил эрчим хүчний салбарыг авбал зөвхөн ашгийн төлөө ажиллана.
Улаанбаатарт эрчим хүч түгээх, хангах эрхтэй 17 хувийн хэвшил байдаг. Төрийн компанийн үйл ажиллагаа улсад алдагдалтай байвал хувийн хэвшилд өгдөг. Эрчим хүчний салбарыг хэн дуртай нь хувийн хэвшилд шилжүүлчихдэг зүйл биш.
Эрчим хүчний салбар маш уналттай байгаа энэ цаг үед ашиг олно гэдэг ямар ч боломжгүй. Аливаа салбарт хувийн хэвшил орвол амжилттай ажилласан туршлага байдаг. Гэхдээ ямар салбар руу хувийн хэвшил оруулах вэ гэдгийг бодох асуудал.
"Улаанбаатар цахилгаан түгээх сүлжээ" ТӨХК-ийн ажиллах чиг үүрэгт хувийн хэвшил оруулах шаардлага байхгүй. Гэхдээ 460 мянган хэрэглэгчдэд 1,940 ажилтантайгаар үйл ажиллагаа явуулахад хүндрэлтэй, маш ачаалалтай ажилладаг.
Манай компани хүний нөөцийн дутагдалд орж байгаа. Жишээлбэл өнгөрсөн онд 358 хүн "Улаанбаатар цахилгаан түгээх сүлжээ" ТӨХК-аас хувийн шалтгаанаар ажлаасаа гарсан. Ингэж олон хүн ажлаасаа гарч байсан тохиолдол түүхэндээ байгаагүй. Энэ жил 233 хүн ажлаас гарсан.
Ажилчид маань сард дунджаар хоёр сая төгрөгийн цалин авч байна. Гэхдээ ажлын гүйцэтгэлийг нь бодвол хангалтгүй. Ер нь эрчим хүчний салбарын компаниуд ашгийн төлөө бус ажлын байртай байх гэж ажилладаг юм шиг.
"Улаанбаатар цахилгаан түгээх сүлжээ" ТӨХК жил бүр алдагдалтай төсөв батлуулдаг. Жишээлбэл энэ жил 12 тэрбум төгрөгийн алдагдалтай төсөв батлуулсан. Ер нь эрчим хүчний салбар ашигтай төсөв баталж байсан удаагүй. Энэ алдагдлыг нөхөх ямар ч боломжгүй.
Манайх ашигтай ажиллахын тулд ажилчдын цалинг нэмэх, технологийн шинэчлэл хийх зайлшгүй шаардлагатай. Технологи муугаас болж ажилчдад ачаалал их ирдэг. Жишээлбэл айлуудын цахилгааны тоолуурыг ХҮТ-ийн ажилчид заавал гараар тоолж, цахилгаан тасалж, залгадаг. Үүнийг технологийн шийдлээр зохицуулбал зардал, мөнгө хэмнэгдэнэ.
Гэхдээ заавал хүний оролцоогүйгээр цахилгааны зардал, борлуулалтыг тохируулах боломжтой. Манай цахилгаан буруу бодлоо, нэг очиж цахилгаан таслах, залгах асуудал яригдахгүй болох юм. 460 мянган хэрэглэгчийн эрчим хүчний хэрэглээнд ухаалаг технологи оруулахад 120 тэрбум төгрөг шаардлагатай гэсэн тооцоолол байгаа" хэмээн ярилаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
