Өмнөд Солонгос нохойн махны хэрэглээг хориглох хуулийг тэргүүн хатагтайнхаа нэрээр нэрлэх гэж байна

Өмнөд Солонгосын хууль тогтоогчид нохойн махыг хүнсэнд хэрэглэхийг хориглох хуулийн төслийг батлуулахаар ажиллаж байна.

Эрх баригч намынхан уг хуулийг амьтны эрхийг хамгаалагч гэдгээрээ алдартай тэргүүн хатагтай Ким Кон Хигийн нэрээр нэрлэхээр төлөвлөжээ.

“Нохойн махыг хүнсэнд хэрэглэхээ болих цаг ирж байна” гэж “Ким Кон Хигийн хууль”-ийг санаачлагчдын нэг болох эрх баригч намын гишүүн Пак Дэ Чул өнгөрсөн долоо хоногт фэйсбүүк хуудсандаа бичсэн байна.

Сөрөг хүчнийхэн энэ хууль дээр санал нэг байгаа тул парламентаар батлуулах ажилд саад учрахгүй гэж бодож байгаагаа тэр бас илэрхийлжээ.

Тэргүүн хатагтай Ким Ко Хи нохойн махыг хүнсэнд хэрэглэдэг хуучирсан ёсыг одоогийн ерөнхийлөгчийн засаглалын хугацаанд багтааж халах бодолтой байгаагаа энэ оны дөрөвдүгээр сард мэдэгдэж байв.

Тухайн үед нохойн аж ахуй эрхлэгчид тэргүүн хатагтайг эрх мэдлээ хэтрүүлж, хүмүүсийн идэх эрхэд халдаж байна хэмээн шүүмжилж байжээ.

 

Ерөнхийлөгч Юн Сүк Ёл сонгуулийн кампанит ажлынхаа эхэн үед нохойн махыг хүнсэндээ хэрэглэх эсэх нь хувь хүний сонголт гэсэн байр суурьтай байв. Харин сүүлдээ тэр энэ уламжлалыг устгахын төлөө ажиллахаа амлах болжээ.

Үүнд тэргүүн хатагтайн нөлөө чухал үүрэг гүйцэтгэсэн гэж үзэж байгаа.

Гэвч тэргүүн хатагтайн нэрээр хуулийг нэрлэх санаа зарим хүмүүст таалагдахгүй байна.

Тухайлбал эрх баригч намын парламент дахь бүлгийн дарга асан Юү Сон Мин “Ерөнхийлөгчтэй бурхан мэт харьцаж, зусарддаг гишүүд одоо тэргүүн хатагтайг хүртэл зусарддаг болжээ” гэж фэйсбүүк хуудсандаа бичээд тэргүүн хатагтайн нэрээр нэрлэсэн хууль урьд өмнө огт харж байгаагүйгээ мэдэгджээ.

Харин хуулийг санаачлагч Пак хуулийн нэрийг “шинэлэг” гэж тодорхойлоод 1965 онд АНУ-д ерөнхийлөгч Линдон Жонсоны гэргийн нэрээр нэрлэсэн “Lady Bird’s Bill” нэртэй гадаад орчны зар сурталчилгааг зохицуулах хууль гарч байсныг жишээ болгон дурдсан байна.

Өмнөд Солонгосын олон нийт нохойн махны хэрэглээг тус улсын нэр хүндийг унагаж буй нэг зүйл гэж үзээд хуулийг дэмжихээ илэрхийлцгээж байна.

Харин зарим нь хуулийн нэрд эргэлзэж байгаагаа нуухгүй байна.

“Хуулийг Ким Ко Хигийн нэрээр нэрлэх хэрэггүй. Энэ бол түүний гавьяа биш, амьтны эрхийг хамгаалах байгууллагуудын олон жилийн тэмцлийн үр дүн юм. Ямар Умард Солонгос биш!” гэж нэг иргэн Пак гишүүний постын дор сэтгэгдлээ бичжээ.

Нохойн махыг хүнсэнд хэрэглэх явдлыг Өмнөд Солонгост хориглоогүй байдаг. Хэдийгээр залуу үеийнхэн ийм хоолыг хэрэглэхээ больсон ч зарим ресторанууд үйлчилсэн хэвээр байгаа.

2021 онд амьтны эрхийг хамгаалах Aware байгууллагын явуулсан санал асуулгад оролцогчдын 78 хувь нь нохойн махны үйлдвэрлэл, борлуулалтыг хориглохыг дэмжсэн бол 49 хувь нь хүнсэнд хэрэглэхийг хориглох ёстой гэж хариулжээ.

Эх сурвалж: South China Morning Post