Илэрхийлэхийг хүссэн санаагаараа өөрийгөө гоёх боломжтой "Ил.эр.хий.Хэл" өдөрлөг маргааш болно

Үг хэлэх, үзэл бодлоо илэрхийлэхдээ заавал чанга яригчаар уран илтгэх бус, үйл хөдлөл, зураг дүрслэл, дуу авиа, загвар дизайн өнгө гээд ямар ч хэлбэрээр нийгэмд хүргэж болохыг таниулах зорилготой "Ил.эр.хий.Хэл" нэртэй өдөрлөгийг маргааш буюу есдүгээр сарын 16-нд 12:30 цагаас УДЭТ-ийн өмнөх талбайд зохион байгуулах гэж байна.

Дэлхийн ардчиллын өдрийг тохиолдуулан зохион байгуулж буй тус өдөрлөгт ирсэн эхний 50 хүн дурын өнгийн футболкыг сонгоод, түүн дээрээ зориулалтын будаг, үзэг ашиглан илэрхийлэхийг хүссэн санаагаа буулгах боломжтой. Энэ нь иргэдийн дуу хоолойг хүргэх нэг хэлбэрийг нийгэмд танин мэдүүлэхээс гадна өөрийн гараар урласан ганцхан хувь бүтээлтэй болох боломжийг оролцогчдод олгож байгаа юм.

Гэвч үзэл бодлоо илэрхийлснийх нь төлөө айдас дарамтад автуулж, залхаан цээрлүүлж, эрүүдэн шүүх зэргээр ардчиллын амин сүнсийг устгах гэсэн оролдлогууд дэлхийн улсуудад гарсаар байна.

Таныг үгээ залгиж, үзэл бодлоо илэрхийлэхээс зайлсхийх бүрд өөр нэгэн захиалгат дуу хоолой "ард түмэн" гэх нэр барьж бодит мэдээллээс холдуулж байдгийг санаарай.

2007 оноос эхлэн НҮБ-аас ардчиллын үнэт зүйлийг тунхаглаж, хамгаалах зорилгоор жил бүрийн есдүгээр сарын 15-нд “Ардчиллын өдөр” тэмдэглэхээр зарласан. Энэ жилийн хувьд “Дараагийн үеэ чадавхжуулах нь” уриан дор хөгжиж буй шинэ ертөнцөд залуучууд дуу хоолойгоо өргөх нь чухлыг сануулан тэмдэглэж байна. НҮБ-ын Ерөнхий нарийн бичгийн дарга Антонио Гутерреш "Олон нийтийн хэлэлцүүлгийг хордуулж, нийгмийн бүлгүүдийг туйлшруулан, нийгмийн институтүүдэд итгэх итгэлийг алдагдуулж байгаа ташаа мэдээлэл, хуурамч мэдээлэл түгж байгааг буруутгаж байна” гэдгээ онцлон хэлсэн.

Хуурамч, ташаа мэдээллийг зохион байгуулалттай түгээж бодит, зөв, чанартай мэдээллийг иргэдээс төөрөгдүүлснээр тэдний оролцоог хумьж, хяналтгүй төрийн үйл ажиллагаа авторитар дэглэм рүү чиглэсээр байгаа нь зөвхөн Монгол Улсад бус, дэлхийн олон улсад нүүрлэж буй аюул юм.