Б.Алтантулга: Яс нь шөрмөс холбоосоор бэхлэгддэг тул хамтад нь авч, шилжүүлэн суулгадаг
Олон нийтийн сүлжээнд өчигдрөөс эхлэн донортой холбоотой мэдээлэл тархсан. Тухайлбал ар гэрийн зөвшөөрөлгүйгээр донорын эдийг авсан тухай асуудал яригдаж байгаа юм.
Үүнтэй холбоотойгоор Эрүүл Мэндийн Хөгжлийн Төвийн ЭЭЭШСА-ы Донорын асуудал хариуцсан мэргэжилтэн Б.Алтантулга дараах тайлбарыг өглөө.
Тэрбээр "Манай алба 2018 онд байгуулагдсан. Хамгийн гол зорилго маань амьгүй донор илрүүлж, эрхтэн шилжүүлэн суулгах юм. Амьгүй донор гарсан нь батлагдвал манай албаны зүгээс гэр бүлийнх нь гурван гишүүнээс зөвшөөрөл авсны дараа эрхтэн авах мэс засал эхэлдэг. Энэ бүх ажил цаг хугацаатай уралддаг.
Бид байгуулагдсан цагаасаа эхлэн нийтдээ 6,580 гаруй удаа донор эмнэлэгтэй уулзаж, мэдээлэл авсан байна. Ингэхдээ 2018 оноос хойш тархины үхжилттэй 260 гаруй донор илрүүлсэн. Үүнээс шалгуурт тэнцсэн 64 донор бий. Гэр бүл нь зөвшөөрсөн байх ёстой тул 64 гэр бүлтэй уулзахад 34 нь зөвшөөрсөн.
Гэр бүлийн уулзалт маш хүнд хэцүү байдаг. Өглөөхөн эрүүл гарсан хүн орой нь хүнд байдалд орчихсон стресстэй, сэтгэл санаа хүнд байгаа үед нь манай алба очиж уулзаад, зөвшөөрөл хүсдэг. Энэ үед нь бид бүх зүйлээ танилцуулж, зөвшөөрвөл гарын үсэг зуруулна. Дараа нь эрхтэн авах, эрхтэн шилжүүлэн суулгах мэс засал эхэлдэг.
Гэр бүлд нь хэлэлгүйгээр авах ямар ч боломжгүй. Шөрмөс, яс нь эд гэдгээрээ явдаг. Жишээлбэл дунд чөмөг гэдэг бол дунд чөмгийг тэр чигт нь авна гэсэн үг биш. Зөвхөн булуу хэсгийг нь авна. Тэр хэсгийг нь авахад ойр орчмын шөрмөс холбоосыг давхар авч байж нөгөө хүндээ шөрмөс холбоосоор нь шилжүүлэн суулгадаг" хэмээв.
Манай улсад донорын хүлээх жагсаалт урт үргэлжилдэг аж. Тухайлбал бөөр шилжүүлэн суулгах шаардлагатай 700 гаруй хүн байна.
Түүнчлэн донороос эрхтэн шилжүүлэх мэс засал цаг хугацаатай уралддаг гэдгийг тэрбээр онцолсон. Тодруулбал "Зүрх зогсоод таван минутын дараа гэхэд бусад эд эрхтэний үйл ажиллагаа бүрэн алдагддаг. Дараа нь авах ямар ч боломж байхгүй" гэлээ.
Донорын тухай хуулиар эрхтэн гэдэгт элэг, бөөр зэрэг эрхтэн орох бол эд гэдэгт шөрмөс, нүдний эвэрлэг, яс болон ясны хэсэг ордог байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
