Өмнөд Солонгост сургуулийн дээрэлхэлтийн түүх 2026 оноос эхлэн элсэлтийн шалгалтын үр дүнд нөлөөлдөг болно

Өмнөд Солонгосын боловсролын яам, Солонгосын дээд боловсролын зөвлөл өчигдөр сурагчдын дунд гардаг дээрэлхэлтийн эсрэг авах арга хэмжээгээ танилцуулжээ.

Ерөнхий боловсролын сургуульд суралцаж байх хугацаандаа бусдыгаа дээрэлхэж, дарамтлах үйлдэл гаргавал энэ нь хувийн хэрэгт тэмдэглэгдэж, хожим их сургуулийн элсэлтийн шалгалтын дүнд нөлөөлдөг болох механизм 2026 оны хичээлийн жилээс эхлэн мөрдөгдөхөөр болсон байна.

Сургуулийн орчинд гардаг хүчирхийлэл Өмнөд Солонгосын нийгмийн нэг эмзэг сэдэв болоод байгаа.

Энэ оны эхээр тус улсын үндэсний мөрдөн байцаах газрын даргад ерөнхийлөгчийн нэр дэвшүүлсэн хүн ийм шалтгаанаар нэрээ татаж байв. Нэр дэвшигчийн хүү сургуульд сурч байхдаа бусдыгаа дарамталж, дээрэлхдэг байсан нь илэрсэн юм.

Үүний дараа дөрөвдүгээр сард ерөнхий сайд Хан Дук Со сургуулийн орчны хүчирхийлэлтэй тэмцэх цогц арга хэмжээний төлөвлөгөөг баталж байв.

Шинэ журмын дагуу 2026 оноос эхлэн их сургуулиуд оюутан элсүүлэхдээ ерөнхий боловсролын сургуулийн хувийн хэргийг нь заавал харгалзан үзэх ёстой болжээ.

Хэрвээ элсэгч дээрэлхэлтийн түүхтэй байвал тухайн сургууль өөрийн үзэмжээр арга хэмжээ авах юм.

Үйлдсэн зөрчлийн хүнд хөнгөнөөс хамаарч тухайн хүүхдийн шалгалтын оноог бууруулахаас эхлээд элсүүлэхээс татгалзах хүртэл арга хэмжээ авахаар болжээ.

Эх сурвалж: Yonhap News