Intel компани эрчим хүчний хэрэглээг үлэмж хэмжээгээр бууруулах шинэ бүтээгдэхүүнээ зарлалаа

Эрчим хүчний өндөр хэмнэлттэй дата төвийн чипийг ирэх онд зах зээлд гаргах болсноо Intel компани өчигдөр зарлажээ.

Цахиурын хөндийн Стэнфордын их сургуульд зохион байгуулагдсан хагас дамжуулагчийн технологийн чуулганы үеэр “Sierra Forest” нэртэй ийм шинэ бүтээгдэхүүнийг зарласан юм.

Уг бүтээгдэхүүн нь өнөөдөр ашиглагдаж буй дата төвийн чипүүдтэй харьцуулахад ватт тутамдаа 240 хувиар илүү өндөр үзүүлэлттэй ажиллах юм байна.

Интернэт сүлжээний гол дэд бүтэц болдог дата төвүүдийн эрчим хүчний өндөр хэрэглээ сүүлийн жилүүдэд эрх баригчид, зохицуулагчдын санааг зовоох болсон юм.

Шахалтад орсон хагас дамжуулагч үйлдвэрлэгчид эрчим хүч хэмнэх чиглэлд идэвхтэй ажиллаж эхлээд байгаа.

Тухайлбал Intel компанийн удирдлагад ажиллаж байсан хүмүүсийн байгуулсан Ampere Computing компани анх удаа үүлэн технологийн эрчим хүчний хэрэглээг бууруулахад чиглэсэн бүтээгдэхүүнийг зах зээлд нэвтрүүлж байв.

Дараа нь AMD компани энэ оны зургаадугаар сард эхний бүтээгдэхүүнээ зах зээлд танилцуулсан юм. Түрүүлж алхам хийсэн AMD, Ampere компаниуд Intel-ийн дата төвийн бүтээгдэхүүний зах зээлээс булааж эхэлсэн байна.

Intel компанийн хувьд дата төвийн чипүүдээ үндсэн хоёр ангилалд хувааж байгаа ажээ.

Эхний “Granite Rapids” ангилалд багтах чипүүд эрчим хүчний хэмнэлтийг хоёрдугаарт тавьж, өндөр үзүүлэлтийг чухалчлах юм байна.

Харин “Sierra Forest” ангиллын чипүүд эрчим хүчний хэмнэлтэд чиглэх гэнэ.

Үүний үр дүнд компаниуд, хэрэглэгчид одоо ашиглаж буй системээ өмнөхөөсөө цөөн тооны компьютер дээр ажиллуулах боломжтойг Intel компанийн ахлах мэргэжилтэн Ронак Сингал тайлбарлажээ.

“Жишээлбэл 4-6 жил ажиллаж буй хуучин системтэй гэж бодъё. Энэ программ нь одоо 5, 10, 15 сервер эзэлж ажилладаг бол ердөө ганц серверт шилжүүлснээр эрчим хүчийг ихээр хэмнэж, зардлаа бууруулах боломжтой” гэж тэр ярьсан байна.

Эх сурвалж: Reuters