Л.Энх-Амгалан: Нэг цэцэрлэг, сургууль, дотуур байрны ариун цэврийн байгууламжийг шинэчлэхэд 160-180 сая төгрөг болж байна
Төрийн өмчийн цэцэрлэг, Ерөнхий боловсролын сургууль (ЕБС), дотуур байрны нүхэн жорлонг орчин үеийн ариун цэврийн байгууламжаар солих төслийн ажлын явцын талаар өнөөдөр Боловсрол шинжлэх ухаан (БШУ)-ны сайд Л.Энх-Амгалан танилцуулга хийлээ.
Нүхэн жорлонг халах ажлыг нийтдээ 18 аймаг, 267 сумын 853 сургууль, цэцэрлэг, дотуур байранд дараах дөрвөн ээлжээр хийхээр төлөвлөжээ.
- 1,2-р ээлжид 16 аймгийн 92 сумын нийт 307 объект
- 3-р ээлжид 17 аймгийн 130 сумын 303 объект
- 4-р ээлжид 18 аймгийн 92 сумын 243 объект
Нийт хийгдэх ёстой 853 объектоос одоогийн байдлаар 183 ариун цэврийн байгууламж ашиглалтад орсон байна.
Гүйцэтгэлийн явц:
1-2-р ээлжид хийгдэж байгаа 307 объектоос өнөөдрийн байдлаар 183 объект ашиглалтад орсон, 29 объект дээр улсын комисс ажиллахад бэлэн болсон, 95 объект дээр угсралтын ажил үргэлжилж байна.
3-р ээлжийн 303 объектоос 30 объектын барилга угсралтын ажлын гүйцэтгэл шалгарсан, 53 объектын тендер зарлагдсан, 60 объектод барилга угсралтын ажлын үнэлгээний хороо байгуулагдсан. 160 объект дээр зургийн ажил үргэлжилж байгаа.
4-р ээлжийн 243 объектын зургийн ажил хийгдэж байгаа.
"Нэмэлт санхүүжилт шаардлагатай байгаа 250-260 объектын санхүүжилтийг шийдэж чадвал бүх сургууль, цэцэрлэг, дотуур байрны нүхэн жорлонг халах боломжтой байна"
Нийт төлөвлөгдсөн 853 объектуудыг хийхэд урьдчилсан байдлаар 160 орчим тэрбум төгрөгийн санхүүжилт шаардлагатай байгаа аж. Үүнээс одоогийн байдлаар Эрдэнэт үйлдвэрийн олгосон 100 тэрбум төгрөгийн санхүүжилтээр 600 гаруй объектын ажлыг хийж дуусгах боломжтой байгаа юм байна.
Үлдсэн 250-260 объектод 50-60 тэрбум төгрөгийн нэмэлт санхүүжилт шаардлагатай байгаа аж.
Уг санхүүжилтийг шийдэж чадвал бүх сургууль, цэцэрлэг, дотуур байрны нүхэн жорлонг халах боломжтой байна гэдгийг тэрбээр хэлж байлаа.
Санхүүжилт нь бэлэн байгаа 600 гаруй объектын ажлыг энэ оны аравдугаар сарын нэгнээс өмнө дуусгахаар зорьжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
7 СЭТГЭГДЭЛТЭЙ
|
