Уншиж байна ...
Зураг
Зураг
ХУУЧИРСАН МЭДЭЭ: 2023/06/08-НД НИЙТЛЭГДСЭН

Б.Энхбаяр: Цэцийн гишүүнээр хууль зүйн өндөр мэргэшилтэй хүнийг томилдог байх шаардлагатай

Б.МАНЛАЙ, IKON.MN
2023 оны 6 сарын 8
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын чуулганы өнөөдрийн хуралдааны эхэнд Үндсэн хуулийн цэцийн 2023 оны хоёрдугаар дүгнэлтийг хэлэлцэж байна.

Шүүхийн тухай хууль, захиргааны хэрэг шүүхэд хянан шийдвэрлэх тухай хууль, эрүүгийн, иргэний хэрэг хянан шийдвэрлэх тухай хуулийн зарим заалт Үндсэн хууль зөрчсөн эсэх маргааныг Цэц дунд суудлын хуралдаанаараа хэлэлцжээ. Цэцийн дунд суудлын хуралдааныг гишүүн Б.Одбаяр даргалсан болохыг танилцууллаа.

Цэцийн дүгнэлтийг хэлэлцэх үеэр УИХ-ын зарим гишүүн шүүмжилж, асуулт, хариулт явуулав.

УИХ-ын гишүүн Ц.Мөнх-Оргил: Зарим хуулийн заалт Үндсэн хууль зөрчөөгүй байна гэчхээд зөрчөөгүй хуулийн заалтыг түдгэлзүүлчихлээ. Хяналтын шатны шүүхээр бүх маргаан орж байж, Үндсэн хуульд заасан шударга шүүхээр шүүгдэх санааг Цэцийн дүгнэлт агуулсан байна. Үндсэн хуулийн 64.1 дэх зүйлд Цэц юу хийх ёстойг тодорхой заасан байдаг. Зарим хуулийн заалт Үндсэн хууль зөрчсөн эсэхийг Цэц тогтоох ёстой. Хуульд нийцээгүй гэдэг нь зарчмын хувьд өөр хэлбэр. Үндсэн хуулийн Цэц хуулийн хийдлийг шалгадаг байгууллагын хуулийн хэлтэс шиг ажиллах, УИХ-ын хууль тогтоох эрхэд халдах эрх хаанаас олоод авчхав?

УИХ-ын гишүүн Б.Энхбаяр: Үндсэн хуулийн Цэцийн процессыг боловсронгуй болгох шаардлагыг энэхүү дүгнэлт нотолж байна.

Цэцийн гишүүнээр академик чиглэлийн буюу хууль зүйн өндөр мэргэшилтэй хүнийг томилдог байх хэрэгтэй. Ном уншдаггүй, хар практикаар явсан хүмүүсийг Цэцэд хэт олон оруулаад байвал шийдвэрүүд өнөөдрийнх шиг гарна.

Цэцийн 2023 оны хоёрдугаар дүгнэлтийн үндэслэл хэсэг ердөө тал хуудас. Дүгнэлтийн үндэслэл хэсэгт "Шударга шүүхээр шүүлгэх иргэний эрхийг хязгаарласан эрх зүйн хийдлийг арилгах шаардлагатай байна" гэсэн нь ямар учраас нийцээгүй, хийдлийг яаж арилгах зэрэг нь тодорхойгүй, судалгаа, онол, тайлбар байхгүй.

Уг дүгнэлтийн үндэслэлийг тааж уншихад хүрч байна хэмээн байр сууриа илэрхийллээ.

ВИДЕО: УИХ-ын чуулганы хуралдаан